Փաստ ինֆո

Կարևորում եմ դատախազության սկզբունքայնությունը։ «Փաստինֆո»-ի հետ զրույցում այսկերպ գնահատեց Գլխավոր դատախազության` ԱԺ նախկին նախագահ Արա Բաբլոյանի գործով մեղադրական եզրակացությունը չհաստատելու գործընթացը։

Դիտարկմանը, որ ՀՀ վարչապետը, ինչպես նաև ԱԺ փոխխոսնակը քանիցս հայտարարել են` այս գործը դատարանում է, մինչդեռ դատախազությունն արդեն երկրորդ անգամ այն ուղարկում է ՀՔԾ` լրացուցիչ քննության, Արամ Վարդևանյանը նկատեց` սա որոշակիորեն կարող է լինել լավ օրինակ, երբ դատախազության համապատասխան դատախազներն իսկապես նկատում եմ առկա խնդիրը. «Չեմ հասկանում` նախաքննական մարմինն ինչու չի ցանկանում դա նկատել։ Այստեղ գործ ունենք երկու հանգամանքի հետ. մեկն արարքի որակումն է, այն է իշխանության յուրացման հետ կապված հանցակազմը, որը բացառիկ ծանրություն և հիմնավորվածություն ենթադրող քրեական օրենսգրքի հոդված է։ Երկրորդն առհասարակ Արա Բաբլոյանի գործողություններն են, որոնք բացառապես իրավաչափ են եղել»,-ասաց Արամ Վարդևանյանը։

Վերջինս ընդգծեց 2005 թվականի Սահմանադրությունն ԱԺ նախագահին պարտավորեցնում են կոնկրետ ժամկետներում հասցնել ապահովել ՍԴ նախագահի ընտրությունները. «Առավելագույնը 30-օրյա ժամկետն է, հետևաբար անկախ նրանից, թե ինչպես կհաշվարկվեր, մինչև ապրիլի 9-ը այսպես, թե այնպես պետք է լիներ ՍԴ նոր նախագահ։ Սա 2005 թվականի Սահմանադրության պահանջն էր»,-ասաց պաշտպանը։

Ավելի վաղ հայտնել էինք, որ դատախազությունը երկրորդ անգամ չի հաստատել Արա Բաբլոյանի գործով մեղադրական եզրակացությունը և այն ուղարկել է ՀՔԾ` լրացուցիչ քննության. «Դատավարական հսկողություն իրականացնող դատախազը ընդունած՝ լրացուցիչ քննություն կատարելու համար գործը քննիչին վերադարձնելու մասին որոշմամբ անհրաժեշտ է համարել լրացուցիչ նախաքննության ընթացքում քրեադատավարական օրենքով սահմանված կարգով փոփոխել մեղադրյալներին առաջադրված մեղադրանքը և նրանց առաջադրել նոր մեղադրանքներ»,-հայտնում են դատախազությունից։

Հիշեցնենք, ԱԺ պատգամավոր Արման Բաբաջանյանի դիմումի հիման վրա, հոկտեմբերի 28-ին ՀՔԾ-ում հարուցված քրեական գործի շրջանակում մեղադրանք էր առաջադրվել ԱԺ նախկին նախագահ Արա Բաբլոյանին՝ ՀՀ քրեական օրենսգրքի 300-րդ և 314-րդ հոդվածների հատկանիշներով՝ Սահմանադրական դատարանի լիազորություններին տիրանալու եւ պաշտոնական կեղծիքի համար։

2019թ դեկտեմբերի 24-ին դատախազությունը ԱԺ նախկին նախագահ Արա Բաբլոյանի և ԱԺ աշխատակազմի ղեկավարի նախկին տեղակալի պաշտոնակատար Արսեն Բաբայանի գործով որոշում էր կայացրել մեղադրական եզրակացությունը չհաստատելու և քրեական գործը լրացուցիչ քննություն կատարելու համար վերադարձնելու մասին։

Աղբյուր` Փաստինֆո