Փաստ ինֆո

Իմքայլական պատգամավոր, «Սահմանադրական փոփոխությունների» նախագծի հիմնական զեկուցող Վահագն Հովակիմյանը Վենետիկի հանձնաժողովի նախագահ Ջիաննի Բուքիքիոյին փաստացի մեղադրել է ՀՀ նախորդ իշխանությունների կողմից կոռումպացված լինելու մեջ՝ այն հիմքով, որ տարիներ առաջ նա պարգևատրվել է ՀՀ շքանշանով՝ ՀՀ Եվրաինտեգրմանը աջակցելու համար։ Նման հայտարարությամբ է հանդես եկել Արցախի նախկին ՄԻՊ Ռուբեն Մելիքյանը` արձագանքելով ԱԺ «Իմ քայլը» խմբակցության պատգամավոր Վահագն Հովակիմյանի այսօրվա հայտարարությանը:

«Շատ արտահայտիչ օրինակ է։ Դե՞մ ես իմքայլականնների դարակազմիկ գաղափարներին։ Համարձակություն ունես հրապարակա՞վ չհամաձայնվել։ Ուրեմն հաստատ կոռումպացված ես։ Այլ կերպ հնարավոր չէ - ով ուզում ես եղիր։

Իմքայլականների ու նրանց աջակիցների շրջանում լայն տարածում ունեցող այս պրիմիտիվ մտայնությունը «մեդալի» միայն մի երեսն է։ Մյուս երեսը զրոյին ձգտող պրոֆեսիոնալիզմն է, է՛լ ավելի ցածր պետական մտածողությունը, բայց անվերջության ձգտող ինքնագնահատականը։

Ու ես, անկեղծ ասած, շատ ուրախ եմ, որ այդ էժան, ճղճիմ մտայնության մասին ես ու ինձ համախոհ մարդիկ ապրիլի 5-ին կարող ենք համապատասխան ուղերձ թողնել դե ֆակտո հանրաքվեի քվեաթերթիկի վրա։ Եթե իհարկե որոշեմ քվեարկել», - նշել է Ռ. Մելիքյանը։

Ինչպես արդեն տեղեկացրել եք` ԱԺ «Իմ քայլը» խմբակցության պատգամավոր Վահագն Հովակիմյանը պնդում է, որ Վենետիկի հանձնաժողովի նախագահ Ջիաննի Բուքիքիոն նախկին իշխանություններից թանկարժեք նվերներ է ստացել։

«Պետք է խնդրեմ, որ Վենետիկի հանձնաժողովի նախագահի անձնական հայտարարությունները չնույնացենք Վենետիկի հանձնաժողովի հետ։ Երբ ասում ենք  Ջանի Բուքիքիոյի հայտարարությունը որևէ հարցով, պետք է հիշեցնենք, որ նա 2009թ-ին Սերժ Սարգսյանի կողմից շատ թանկարժեք նվեր է ստացել Հայաստանում, այն ժամանակ թանկարժեք ադամանդներով հատուկ շքանշան էին տվել նրան»,-այս մասին այսօր 1in.am-ի հետ զրույցում ասել է պատգամավորը։

«Փաստինֆո»-ն ավելի վաղ տեղեկացրել է, որ  2009-ին նախագահ Սերժ Սարգսյանի հրամանագրով Եվրախորհրդի «Ժողովրդավարություն` իրավունքի միջոցով» եվրոպական հանձնաժողովի (Վենետիկի հանձնաժողով) գլխավոր քարտուղար Ջանի Բուքիքիոյին Պատվո շքանշանով պարգեւատրելու փաստը: Պատգամավորը, թերեւս, նկատի է ունեցել այս պարգեւատրումը

Աղբյուր` Փաստինֆո