Փաստ ինֆո

«Այն, որ ի սկզբանե այս քրեական գործի հարուցումը ապօրինի էր, որ ՍԴ-ի կողմից Հրայր Թովմասյանին կարգապահական պատասխանատվության ենթարկելու միջնորդությունը վարույթ չընդունելու հաջորդ իսկ օրը հարուցված այս գործը պարզապես հերթական ճնշման միջոցն էր ՍԴ-ի վրա, ակնհայտ էր ի սկզբանե։ Այն, որ քննությամբ իսկ հիմնավորված է, որ պաշտոնեական կեղծիք տեղի չի ունեցել, իսկ ՍԴ իրավասություններին տիրանալու մասին պնդումները մեղմ ասած անտրամաբանական են, ակնհայտ է հիմա` գործի քննության արդյունքով»,- «Փաստինֆո»-ի հետ զրույցում ասաց ԱԺ  աշխատակազմի  ղեկավարի նախկին տեղակալ Արսեն Բաբայանի փաստաբան Երվանդ Վարոսյանը՝ անդրադառնալով այն փաստին, որ դատախազությունը կրկին չի հաստատել ԱԺ նախկին նախագահ Արա Բաբլոյանի գործով մեղադրական եզրակացությունը և Արա Բաբլոյանին ու ԱԺ աշխատակազմի ղեկավարի նախկին տեղակալ Արսեն Բաբայանին առաջադրված մեղադրանքը փոխելու համար գործը ոուղարկել է լրացուցիչ քննության։

Դիտարկմանը, թե ինչի մասին է վկայում դատախազության այս քայլը՝ հաշվի առնելով այն հանգամանքը, որ  ՀՀ վարչապետ Նիկոլ Փաշինյանը , ըստ էության խախտելով անմեղության կանխավարկածը , հայտարարել էր, թե ՍԴ-ի լիազորություններն օկուպացված են՝ արդեն իսկ իր դատավճիռը կայացնելով, փաստաբանը դժվարացավ պատասխանել։ Երվանդ Վարոսյանը միայն շեշտեց․«Իրավական տեսակետից քննարկել ակնհայտ քաղաքական գործընթացն անշնորհակալ գործ է։ Ուստի սպասենք զարգացումներին»։

Հիշեցնենք, որ ԱԺ նախկին նախագահ Արա Բաբլոյանին մեղադրանք էր առաջադրվել ՀՀ քրեական օրենսգրքի 300-րդ հոդվածի 1-ին մասով և 314-րդ հոդվածի 1-ին մասով, իսկ ԱԺ  աշխատակազմի  ղեկավարի նախկին տեղակալ Արսեն Բաբայանին՝ ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով։

Դատախազությունն այսօր  տեղեկացրել էր, որ  քրեական գործի նախաքննության ընթացքում ձեռքբերված ապացույցների բավարար համակցությամբ Արա Բաբլոյանի արարքը առերևույթ համապատասխանում է ՀՀ քրեական օրենսգրքի 308-րդ հոդվածի 2-րդ մասով և 314-րդ հոդվածի 1-ին մասով նախատեսված հանցագործությունների, իսկ Արսեն Բաբայանի արարքը՝ ՀՀ քրեական օրենսգրքի 38-308-րդ հոդվածի 2-րդ մասով և 314-րդ հոդվածի 1-ին մասով նախատեսված հանցագործությունների հատկանիշներին, հետևաբար դատավարական հսկողություն իրականացնող դատախազը անհրաժեշտ է համարել փոփոխել մեղադրյալներին առաջադրված մեղադրանքը և նրանց առաջադրել նոր մեղադրանքներ։

Փաստորեն, դատախազությունը արդեն երկրորդ ագամ չի հաստատում Սահմանադրական դատարանի լիազորություններին տիրանալու մեղադրանքը։

Նկատենք, որ այս քրեական գործերն ուղղակիորեն առնչվում են ՍԴ-ի եւ ՍԴ նախագահ Հրայր Թովմասյանի շուրջ ընթացող զարգացումներին, որոնց նպատակը ՍԴ-ի գործող կազմից ազատվելն է՝ բացառությամբ իշխանափոխությունից հետո ընտրված դատավորներ Վահե Գրիգորյանից եւ Արման Դիլանյանից։

Աղբյուր` Փաստինֆո