Փաստ ինֆո

«Բավրայի»   մաքսակետի գործով ձերբակալված տեսուչին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով և նույն օրենսգրքի 311-րդ հոդվածի 4-րդ մասի երկրորդ կետով՝ պաշտոնեական լիազորությունները չարաշահելու և առանձնապես խոշոր չափերով կաշառք ստանալու հատկանիշներով և միջնորդություն է ներկայացվել դատարան՝ նրա  նկատմամբ կալանավորումը որպես խափանման միջոց ընտրելու մասին։ Այս մասին «Փաստինֆո»-ին հայտնեց  պաշտպան Վահան Հովհաննիսյանը։

Նրա գնահատմամբ՝  մեղադրանքի առաջադրումն ապօրինի է, քանի որ ցուցումը տվել է վարչապետը։

Ավելին՝ փաստաբանը տեղեկացրեց, որ  պաշտպանական կողմին չի տրամադրվել  ձերբակալման մասին որոշումը։

«Այդ խնդրի վերաբերյալ մենք դիմելու ենք ՄԻՊ-ին, քանի որ ձերբակալման արձանագրությունն անգամ մեր պաշտպանյալին չեն տրամադրել։ Մենք միջնորդությունը ներկայացրել ենք, բայց մեզ նույնպես չեն տրամադրել՝ դրանով իսկ զրկելով մեզ բողոքարկման հնարավորությունից»,- նշեց Վահան Հովհաննիսյանը։

Ավելի վաղ տեղեկացրել ենք, որ նույն կասկածյալի մասնակցությամբ նախօրեին ԱԱԾ քննիչը քննչական գործողություն է կատարել՝ առանց պաշտպանների՝ խախտելով նրա պաշտպանական իրավունքները։ «Այն, ինչ մենք ենք տեսնում, կարծում եմ, իրավական բեսպրեդելի տիպիկ օրինակ է: Սա իրավական բեսպրեդել է»,- «Փաստինֆո»-ին ասել էր Հովհաննիսյանը:

Հիշեցնենք՝ կառավարության փետրվարի 6-ի նիստում վարչապետը հայտարարել էր, թե Բավրայի մաքսակետում անցած գիշեր բացահայտվել է մաքսանենգության խոշոր դեպք, որում ներգրավված են մաքսային ծառայության մի շարք աշխատողներ, ինչից որոշ ժամանակ անց ԱԱԾ-ն պաշտոնական հաղորդագրություն տարածեց, թե ՀՀ պետական եկամուտների կոմիտեի հյուսիսային մաքսատուն-վարչության իշխանության ներկայացուցչի գործառույթներ իրականացնող «Բավրա» մաքսակետի հերթափոխի պետը եւ մաքսային 2 տեսուչ, 2020 թ. հունվարի 25-ին ընդունելով բեռնափոխադրումներ իրականացնող կազմակերպության համասեփականատիրոջ առաջարկը, համաձայնության են եկել առանձնապես խոշոր չափի՝ 1.436.610 ՀՀ դրամին համարժեք 3000 ԱՄՆ դոլար կաշառք ստանալու դիմաց, առանց պատշաճ մաքսային հսկողության եւ ձեւակերպման մաքսային տարածքից բաց թողնել հիշյալ կազմակերպության կողմից Վրաստանից տեղափոխվող շուրջ 4.5 տոննա ընդհանուր քաշով բեռը:

Առերեւույթ հանցագործության դեպքերի առթիվ ՀՀ ԱԱԾ քննչական դեպարտամենտում հարուցվել է քրեական գործ ՀՀ քրեական օրենսգրքի համապատասխան հոդվածներով, ենթադրյալ հանցագործություն կատարած 4 անձ ձերբակալվել է:

Հեղինակ` Իզաբել Սահակյան

Աղբյուր` Փաստինֆո