Փաստ ինֆո

«Ընթացակարգային խախտումների ամենացցուն օրինակը բերեմ, որ երեկ տեղի ունեցավ՝ ԱԺ կանոնակարգ սահմանադրական օրենքը ։ Առնվազն պետք է գլխադասային հանձնաժողով նշանակվեր, այդ հանձնաժողովը տար եզրակացություն՝ որոշման հետ կապված։ Մենք պետք է խնդիրն ընդհանուր նայենք, տեղի է ունենում փոփոխություն, այն էլ Մայր օրենքի՝ մեր օրենսդրության իրավական պետության ողնաշարի՝ Սահմանադրության փոփոխություն է տեղի ունենում եւ որեւէ մասնագիտական կառույց՝ գլխադասային հանձնաժողովից մինչեւ ՍԴ եւ միջազգային փորձագիտական կառույցներ, չեն տվել իրենց եզրակացությունը»,-«Փաստինֆո»-ի հետ զրույցում ասաց ԱԺ պետաիրավական հարցերի մշտական հանձնաժողովի նախկին նախագահ Հովհաննես Սահակյանը՝ անդրադառնալով նախօրեի ԱԺ արտահերթ նիստի ընթացքում ընդունված որոշման նախագծին, որով իշխանությունը ցանկանում է Սահմանադրական փոփոխությունների նախագիծը հանրաքվեի դնել՝ անտեսելով նույն Սահմանադրության հոդվածները։

Հովհաննես Սահակյանն ասաց՝ հարցը քաղաքականացնել չի ցանկանում, զուտ մասնագիտական տեսանկյունից է մոտենում խնդրին։ «Դա շատ վատ պրակտիկա է, շատ վատ։ Որպես իրավաբան եմ ասում՝ հանրաքվեով ընդունված իրավական բարձրագույն ուժ ունեցող ակտը կոշտ փոփոխման ենթակա է, այն պետք է զերծ մնա քաղաքական անցուդարձից, քաղաքական գործընթացներին հարմարացնելով փորեւէ փոփոխության փորձ ուղղակի անթույլատրելի է։ Նման պրակտիկա գոյություն չունի»։

Հովհաննես Սահակյանի խոսքով, իշխանությունը անգամ չլսեց ԵԽԽՎ համազեկուցողների հորդորը, որոնք կոչ արեցին դիմել Վենետիկի հանձնաժողով՝ խորհրդատվական եզրակացությունն ստանալու համար.«Մեր միջազգային պարտավորությունները, մեր պետության բռնած ճանապարհը բոլորովին այլ տեղ է տանում, այս քայլը՝ այլ։ Մենք կիլոմետրերով հեռանում ենք իրավական պետություն կոչվելուց։ Երկու քաղաքական մարմինները ՝ ԱԺ-ն եւ գործադիրը փորձում են ճնշում գործադրել դատական իշխանության վրա, փորձում են բարձրագույն դատական մարմնի վերաբերյալ որոշում կայացնել եւ ազատվել անցանկալիներից, էլ չեմ ասում, որ այնտեղ կան բարձրակարգ իրավաբաններ եւ դատավորներ» ,-ասաց Սահակյանը։

Նա շեշտեց՝ երեկ ԱԺ-ում որեւէ մասնագիտական ելույթ չհնչեց, ընդամենը տեսանք նորից ժողովրդին, հպարտ քաղաքացիներին հիշելու ու հղում անելու պրակտիկան ։ «Փորձեցին ժողովրդին տանել այն ուղղությամբ, որ մոռանան «պողոսներին», աղքատությունը գլխներում չհաղթահարած մարդկանց, այն երեք հարյուր քանի հազար անբան մարդկանց, որոնց մասին խոսում էր վարչապետը, փորձեցին մոռացության տալ սպանդանոցների, տաքսիների, արագաչափերի թեման, փորձեցին նորից հեղափոխական լոզունգներ բերել օրակարգ, որպեսզի կարողանան իրենց ցանկացած հանրաքվեն իրականացնել»,-նկատեց Հովհաննես Սահակյանը՝ հիշեցնելով, որ երկրի նախագահը եռօրյա ժամկետում կարող է չստորագրել եւ նախագիծն ուղարկել ՍԴ՝ եզրակացություն ստանալու, իսկ ԱԺ առնվազն 1/5-ը, այսինքն 27 պատգամավոր կարող են իրենք ուղարկել ՍԴ։

«Ես լիահույս եմ , որ երկու դեպքում էլ կունենան այդ իրավագիտակցությունը եւ պետական մտածողությունը եւ կփորձեն ստանալ մասնագիտական եզրակացություն եւ նախագիծը կուղարկեն ՍԴ։ Եթե Սահմանադրության հետ կապված որեւէ խնդիր չլինի եւ ընթացակարգերը պահպանվեն, իհարկե, հանրաքվեն ժողովրդավարության բարձրագույն դրսեւորումն է, թող դնեն հանրաքվեի»,-ասաց Հովհաննես Սահակյանը։

Դիտարկմանը, որ ունենք նախադեպ, երբ գործող իշխանությունն արհամարհում է ՍԴ-ի որոշումը՝ այն հայտարարելով ապօրինի, Հովհաննես սահակյանն արձագանքեց. «Եթե մենք իրավական պետություն ենք, մենք պետք է հավատարիմ մնանք Սահմանադրությանը, որտեղ սեւով սպիտակի վրա գրված է՝ ՍԴ-ի որոշումները ուժի մեջ են մտնում հրապարակման պահից եւ բողոքարկման ենթակա չեն։ Աստված մի արասցե մենք գնանք այն սցենարով, որ առանց ՍԴ-ի եզրակացության այդ հանրաքվեն կայանա, այդ դեպքում մեր երկիրը կդնենք լուրջ հարվածի տակ »։

Սահակյանի խոսքով, այդ պարագայում միջազգային կոշտ արձագանքն ու դրա հետեւանքներն այլեւս անխուսափելի կլինեն։
Հովհաննես Սահակյանը հույս հայտնեց, որ այնուամենայնիվ, իրավաբանները, որոնք այսօր խորհրդարանում են ու հարգում են իրենց մասնագիտությունը, օրվա քաղաքական պահանջը կստորադասեն իրական պետության գաղափարից։ «Առանց այն էլ մենք կարմիր գիծը հատել ենք»,-եզրափակեց Հովհաննես Սահակյանը։

Աղբյուր` Փաստինֆո