Փաստ ինֆո

Դեկտեմբերի 2-ին ՊԲ N զորամասի պահպանության տեղամասի մարտական դիրքում հրազենային վնասվածքից մահացած ժամկետային զինծառայող Արթուր Աջամյանի մարմնի վրա բռնության հետքերը հաստատվել են դատաբժշկական փորձաքննությամբ։ Այս մասին «Փաստինֆո» -ի հետ զրույցում ասաց Աջամյանի իրավահաջորդի ներկայացուցիչ Հայարփի Սարգսյանը։

Նրա փոխանցմամբ՝ Աջամյանի ճակատի վրա հրազենային վնասվածքից բացի հայտնաբերվել է նաեւ արյունազեղում, որը պատճառված է եղել մահվանից րոպեներ առաջ։

«Վնասվածքներ են եղել նաեւ ձեռքերին, ոտքին, ուսին, ճակատին՝ տարբեր վաղեմություններով, մասնավորապես՝ ճակատին արյունազեղումը եղել է րոպեներից մինչև մեկ ժամ վաղեմությամբ, մնացած վնասվածքները՝ դեպքի օրվա, 1-2 օրվա և 5 օրվա վաղեմությամբ ոտքի սալջարդ։ Այսինքն՝ բութ գործիքով հարվածի արդյունք էր»,- նշեց Սարգսյանը։

Ճշգրտող հարցին, թե արդյո՞ք կարելի է ենթադրել, որ վերջին մեկ շաբաթվա ընթացքում զինծառայողը ենթարկվել է բռնության, փաստաբանն ասաց, որ վերջին մեկ շաբաթվա ընթացքում մի շարք վնասվածքներ է ստացել՝ մարմնի տարբեր հատվածներում։

Հարցին, թե արդյո՞ք հայտնաբերվել են սեռական բռնության հետքեր, փաստաբանը պատասխանեց, որ դատաբժշկական փորձաքննությամբ նման հետքեր չեն հայտնաբերվել։

Բացի այդ՝ դատաբժշկական փորձաքննությամբ նաև չեն հայտնաբերվել ալկոհոլ, թմրանյութեր և հոգեմետ նյութեր, իսկ ստամոքսը եղել է դատարկ։
Ինչ վերաբերում է վիրավորում ստացած զինծառայողին, փաստաբանն ասաց, որ վերջինս գտնվում է ծայրահեղ ծանր վիճակում, միացված է արհեստական շնչառություն։ Սարգսյանի փոխանցմամբ՝ վիրավորում ստացած զինծառայողի մոտ հայտնաբերվել է միայն հրազենային վնասվածք։

Հիշեցնենք, որ զինվորն սպանվել է 2019թ. դեկտեմբերի 2-ին՝ վաղ առավոտյան։ Պաշտոնական հաղորագրության համաձայն, ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում, մահացու հրազենային վիրավորում է ստացել ՊԲ զինծառայող, 1998թ. ծնված Արթուր Իշխանի Աջամյանը, իսկ զինծառայող, 1999թ. ծնված Դավիթ Հարությունի Մելիքբեկյանը վիրավորվել է:

Նույն օրը Քննչական կոմիտեն տեղեկացրեց, որ դեպքի առթիվ քրեական գործ է հարուցվել սպանության հատկանիշներով՝ ՀՀ քրեական օրենսգրքի 34-104-րդ հոդվածի 2-րդ մասի 1-ին կետով /երկու կամ ավելի անձանց սպանության փորձ/։

Մամուլում շրջանառության մեջ էր դրվել` զինվորի կողմից ծառայակցին սպանելու փորձ կատարելու, ապա ինքնասպանություն գործելու վարկածը, ինչը վրդովմունք էր առաջացրել մահացած զինծառայողի ծնողների, հարազատների մոտ, որոնք բողոքի ակցիա էին իրականացրել Աժ-ի մոտ` պահանջելով պարզել իրենց որդուն սպանողին. Նրանք հավատացած են, որ սպայական անձնակազմը շատ լավ գիտի, թե ինչ է տեղի ունեցել իրականում:

ՔԿ-ից հայտնեցին, որ այս քրեական գործով մեղադրյալներ դեռ չկան։

Հեղինակ՝ Իզաբել Սահակյան

Աղբյուր` Փաստինֆո