Փաստ ինֆո

«Այն, ինչին մենք ականատես եղանք երեկ, վկայում է, որ  հանրաքվեի հետ գործընթացները, իհարկե, եթե ամեն ինչ գնա իշխանությանը ցանկալի հունով, շարունակելու է ընթանալ սեւ-սպիատակի տրամաբանության մեջ»,- «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով նախօրեին ԱԺ—ում ծավալված իրադարձություններին եւ ՍԴ 7 դատավորների հեռացման հարցը հանրաքվեի դնելու իշխանության որոշմանը։

Քաղտեխնոլոգի  խոսքով, Նիկոլ Փաշինյանն ու իր թիմը  շատ լավ հասկանում են, որ թե Հրայր Թովմասյանի, թե առհասարակ, ՍԴ-ի թեման  այն հարցը չէ, որը ակտուալ է հասարակության մեծ զանգվածների համար։ «Հասարակության գերակշիռ զանգվածների համար Հրայր Թովմասյանի , ՍԴ-ի թեման իր նշանակությամբ տասներորդական նշանակությունն ունի, ուստի, որպես այդպիսին դժվար թե ներկայացնի։ Հենց այս պատճառով այդ հարցը պետք է փաթեթավորել այլ սոուսի  մեջ՝ հեղափոխական: Այսինքն, ներկայացվելու է, որ հեղափոխությունը չի ավարտվել, ռեւանշիստները  վերջին բաստիոնը պահում են, պետք է պայքարել հակահեղափոխականության դեմ»,-բացատրեց քաղտեխնոլոգը։

Հիշեցնենք, նախօրեին ԱԺ-ում ելույթ ունենալով վարչապետ Փաշինյանը պետության դավաճան կարգեց բոլոր նրանց, ովքեր կհամարձակվեն իրավական ճանապարհով խոչընդոտել հանրաքվեի անցկացումը, նա կրկին անընդունելի բառամթեք օգտագործեց՝ հայտարարելով, որ շուտով լսվելու է «շնաբարո դուրսպրծուկների վնգստոցը»։

Վիգեն Հակոբյանն ասաց՝  այս դեպքում էլ օգտագործվում է նույն հռետորաբանությունը, որով գործող իշխանությունը եկավ ։

«Սա քաղաքական տեխնոլոգիա է , իսկ քաղաքական տեխնոլոգիան  որոշակի մանիպուլյացիա է։ Իրենք հասկանում են պրոբլեմի էությունը, որ շատ դժվար է լինելու հանրությանը հրամցնել այն գաղափարը , որ սա ձեր ամենագլխավոր խնդիրներից մեկն է, որի  պատճառով մենք հանրաքվեի ենք գնում, որի  պատճառով մենք Արեւմուտքի հետ ենք վատացնում մեր հարաբերությունները եւ դեռ պարզ էլ չի թե ինչ գին կվճարվի։ 60 օր  փոխադարձ ուղեղների լվացում է լինելու»,-ասաց Վիգեն Հակոբյանը՝ շեշտելով, որ խնդիրը  բավականին բարդ է:

Ըստ նրա, հաջողության հասնելու համար իշխանությունից մեծ ջանքեր են պահանջվելու։  «Հանրաքվեի մասին» օրենքի համաձայն, հանրաքվեի դրված նախագիծը համարվում է ընդունված, եթե կողմ է քվեարկել քվեարկության մասնակիցների կեսից ավելին, բայց ոչ պակաս, քան ընտրական ցուցակներում ընդգրկված քաղաքացիների մեկ քառորդը:

Վիգեն Հակոբյանի խոսքով, ստացվում է , որ 650 հազար կողմ ձայն է հարկավոր։ «Իսկ դրա համար պետք է  համապատասխան ակտիվություն լինի։ Այսօրվա իրողությունների պարագայում ես չեմ բացառում, որ ինչ-որ փուլում  փորձ անեն փոխել նաեւ այդ օրենքը, որպեսզի այդ շեմը իջեցնեն։ Վերջին ընտրությունների ժամանակ ընտրողների քանակը 2.5 միլիոնին մոտ էր, եթե դա բաժանում ենք 4-ի՝ 25 տոկոսի, 650 հազարին մոտ է լինում, սա պրոբլեմատիկ է։ Եթե չես կեղծելու, իսկ իշխանությունը հայտարարում է, որ կեղծիքների էջը փակված է, ուրեմն պետք է կարողանա քարոզչական գործիքակազմի շնորհիվ նախ մարդկան բերել  հանրաքվեի , ապա ստանալ կողմ ձայներ, բայց մենք տեսանք, որ նույնիսկ խորհրդարանական էյֆորիայի պիկի ժամանակ խորհրդարանական ընտրություններին մասնակցությունը անգամ 50 տոկոսի չհասավ»,-ասաց Վիգեն Հակոբյանը։

Նշենք, որ թավշյա հեղափոխությանը հաջորդած արտահերթ ընտրություններին պաշտոնական տվյալներով,  2 մլն 592 հազար  479  ընտրողներից քվեարկությանը մասնակցել է   1 միլիոն 260 հազար  840  քաղաքացի կամ  48,63 տոկոսը։

Աղբյուր` Փաստինֆո