Փաստ ինֆո

Երեկ «ԻՄ քայլը դաշինքը պառլամենտարիզմի մաստեր-կլաս ցուցաբերեց»՝ Նիկոլ Փաշինյանի այս գրառումը՝ ՖԲ պաշտոնական էջում՝ ուղղված սեփական 88 հոգանոց քայլականներին, վստահաբար, առ «Լուսավոր Հայաստան» կուսակցության նախագահ Էդմոն Մարուքյանի՝ իսկապես պառլամենտարիզմի մաստեր-կլաս հանդիսացող ելույթից հետո էլեկտրաշոկի և քաղաքական նախանձի տիպիկ դրսևորում էր:

Անկեղծ լինենք, և՛ ընդդիմադիր, և՛ իշխանություն եղած ողջ ընթացքում նման ելույթ ԱԺ-ում Նիկոլ Փաշինյանը չի ունեցել, նրա բոլոր ընդդիմադիր ելույթները երեկվա իր հոխորտալից և քաղաքական բառապաշարի առումով նոնսենս հանդիսացող «Շնաբարո դուրսպրծուկների վնգստոց»-ների և այս ժանրի տեքստերի շրջանակում են եղել, ընդ որում, մշտապես հագեցած միտումնավոր որակումներով, անձնական մոտիվներով:

Եվ գիտե՞ք որն է ամենազարհուրելին ու անազնիվը. Փաշինյանն իր գռեհիկ բառապաշարով, իր մտքերի և խոսքերի ցածրակարգ տոնայնությամբ, իր մերկապարանոց և ապագաղափարական հայտարարություններով քաղաքական և մասնագիտական առումով զրոյացնում և ոչնչացնում է իր հետ հույսեր կապած, մատների վրա հաշվելի պրոֆեսիոնալներին:

Ի՞նչ ասել է «Շնաբարո դուրսպրծուկների վնգստոց» ՝ իր այս բառապաշարով ու՞մ է հաճոյանում Նիկոլ Փաշինյանը: Ո՞ր ժողովրդի՞ն: Արդյոք այն գյուղացիներին, որոնք ամեն հինգշաբթի կառավարության առջև բողոքի ցույցեր են անում, թե՞ այն ավտոներկրողներին, որոնք իր իսկ անպատասխանատու հայտարարությունների համատեքստում՝ վարկերի տակ ընկան՝ ինչ է թե՝ այդ մեքենաների մաքսազերծման արդյունքում բյուջեն փող լցվի, բյուջեից էլ պարգևատրումների տեսքով հոսի փաշինյանականների գրպանը: Կամ՝ թերևս ուղղված է քաղաքացիական ակտիվ դիրքորոշում ունեցող անձանց ասֆալտին փռող ոստիկանների՞ն, իսկ միգուցե այդ տոնայնության երկրպագուն զինվորների ծնողներն են, որոնց զավակների հետ անմարդկային լեքսիկոնով խոսողների թիվը Փաշինյանի այսօրինակ ելույթներից հետո, աներկբա բազմապատկվում է:

ՀՀ բոլոր քաղաքացիների նկատմամբ բացարձակ անհարգալից վերաբերմունքի դրսևորում էր Նիկոլ Փաշինյանի երեկվա ելույթը, որի գնահատականը Լուսավոր Հայաստանից զատ պարտավոր էր տալ նաև ԱԺ մեկ այլ խմբակցություն, մեկ այլ ուժ:

Իհարկե, երեկ կատարվածին ԲՀԿ բացարձակ բացակա լինելը, պետության համար հույժ կարևոր հարցի քննարկումից խուսափելը և Փաշինյանի ելույթին գնահատական տալուց փախչողի կեցվածքը քաղաքական անվանելը, մեղմ ասած, ծիծաղելի է: Մանավանդ, Էդմոն Մարուքյանի ուժեղ և ,,կլասիկ քաղաքական,, ելույթից հետո:

Նրա ելույթն ուղղակիորեն ջարդեց, հողին հավասարեցրեց ներկա իշխանիկների՝ սիրած՝ ,,մեխն էլ է մեր ձեռքին, մուրճն էլ,, մտածողությունը, որն ուղղակիորեն կրկնում է՝ ՀՀՇ-ական «Մեր դեմ խաղ չկա» գաղափարաբանությունը:

Իսկ ԲՀԿ-ն լռեց, լռեց, հաստատելով, որ համաձայն է Փաշինյանի խոսքերին ու լեքսիկոնին, լռեց, հաստատելով, որ ներկա իշխանություններին սպասարկող օլիգարխիայի հետ խնամիական կապեր հաստատելը ոչ միայն հաշվենկատ ամուսնություն էր, այլև՝ հստակ կողմնորոշում:

Լռեց, ինչպես միշտ է լռել՝ երկրի համար կարևոր և ճակատագրական պահերին:

Հեղինակ՝ Աննա Աթանեսյան

Աղբյուր` Փաստինֆո