Փաստ ինֆո

Երևանի ընդհանուր իրավասության դատարանի դատավոր Դավիթ Գրիգորյանի նկատմամբ քրեական գործ հարուցելու մասին որոշման դեմ պաշտպանի բողոքի քննությունը կշարունակվի մարտի 11-ին։ 

«Փաստինֆո»-ի հետ զրույցում դատավորի պաշտպան Գեորգի Մելիքյանը նկատեց, որ արդեն իսկ օրինական ուժի մեջ մտած դատական ակտ կա, ինչը պաշտպանի կարծիքով պարտավորեցնող է դատարանի համար. «Եթե դատարանն օրինակ բողոքը չբավարարի, այստեղ երկու դատական ակտերի մեջ հակասություն կլինի։ Ընդ որում առաջին ակտն արդեն օրինական ուժ է ստացել, իսկ ներկայինս՝ ոչ։ Հետևաբար չբավարարելու դեպքում երկու ակտերն իրար կհակասեն։ Կարծում եմ՝ դատարանն այստեղ թույլ կտա դատական սխալ»,-ասաց Գեորգի Մելիքյանը։

Նշենք, որ ավելի վաղ Գեորգի Մելիքյանը «Փաստինֆո»-ի հետ զրույցում ասել էր, որ Վերաքննիչ քրեական դատարանն արձանագրել է՝ քրեական գործը հարուցելիս դատավոր Դավիթ Գրիգորյանի գործառութային անձեռնմխելիությունը չի հաղթահարվել, հետևապես քրեական գործ հարուցելու մասին որոշումը ճանաչել է ոչ իրավաչափ։ Նշենք, որ դատախազությունը բողոքարկել է Վերաքննիչ դատարանի այս որոշումը, սակայն Վճռաբեկ դատարանն այն վարույթ չի ընդունել։

Անդրադառնալով դատավոր Դավիթ Գրիգորյանի աշխատասենյակը խուզարկելիս ՀՔԾ քննիչի կողմից թույլ տրված չարաշահումների դեպքի առթիվ քրեական գործի հարուցումը մերժելու մասին որոշման դեմ բողոքին՝ Գեորգի Մելիքյանը տեղեկացրեց՝ այն դեռ քննության փուլում է։ Բողոքի քննությունը տեղի կունենա փետրվարի 20-ին դատավոր Կարեն Ֆարխոյանի նախագահությամբ։

Հիշեցնենք, որ Դավիթ Գրիգորյանն այն դատավորն է, որը մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը։ Այդպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։

Հուլիսի 16-ին ՀՔԾ աշխատակիցները մեկ այլ քրեական գործի շրջանակում խուզարկել էին Գրիգորյանի աշխատասենյակը եւ կնիքել այն։ Աշխատասենյակից կատարվել էին առգրավումներ։ Սրանից հետո նրա պաշտպանը հանցագործության մասին հաղորդում էր ներկայացրել ոստիկանություն, որտեղից նյութերն ուղարկել էին Դատախազություն: Դատախազությունն էլ հաղորդման հիման վրա նախապատրաստված նյութերը ուղարկել էր ԱԱԾ: Հուլիսի 30-ին Ազգային անվտանգության ծառայությունը ՀՀ քրեական օրենսգրքի 147-րդ հոդվածով և 308-րդ հոդվածով նախատեսված հանցագործությունների հանցակազմի բացակայության հիմքով քրեական գործ հարուցելը մերժելու մասին որոշում էր կայացրել: Թեեւ անգամ ԲԴԽ-ն հայտարարել էր, որ քննիչը կատարել է ՀՀ քրեական դատավարության օրենսգրքով չնախատեսված գործողություն՝ կնիքելով դատավոր Գրիգորյանի աշխատասենյակի մուտքի դուռը:

Դավիթ Գրիգորյանին մեղադրանք էր առաջադրվել ՀՀ քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ Նրա լիազորությունները դադարեցված են։

Հեղինակ՝ Հասմիկ Կոշկարյան

Աղբյուր` Փաստինֆո