Փաստ ինֆո

ԱԺ ԲՀԿ խմբակցության իրավաբան պատգամավոր Գեւորգ Պետրոսյանը քիչ առաջ մի քանի հարց ուղղեց խորհրդարանում իշխող խմբակցության պատգամավորների աղմկահարույց նախագիծը ներկայացնող իմքայլական Վահագն Հովակիմյանին, սակայն, հարցերի պատասխաններն այդպես էլ չստացավ։ 

Պատգամավորը նախ խնդրեց կոնկրետ պատասխանել, թե որեւէ տարբերություն կա՞ ՍԴ անդամների լիազորությունների եւ գործունեության երաշխիքների միջեւ՝ ելնելով այն հանգամանքից, թե նրանք քանի տարով են պաշտոնավարում։ Ապա` Գևորգ Պետրոսյանը անդրադառնալով Վահագն Հովակիմյանի ձեւակերպումներին, հարցրեց.«Որ ասում եք ոչ լեգիտիմ ՍԴ անդամներ , էդ ո՞ր կանոնով էիք այդ ոչ լեգիտիմ ՍԴ անդամներին վաղաժամ թոշակի ուղարկում»։ Մյուս հարցը վերաբերում էր ՍԴ դատավորների վրա գործադրված ճնշումներին. «Կարո՞ղ եք ասել ՝ կոնկրետ ո՞ր դատավորների նկատմամբ ո՞վ եւ ինչպիսի՞ ճնշում է գործադրել»։ Եվ վերջում, պատգամավոր խնդրեց հստակեցնել,թե ի վերջո, ի՞նչ նախագիծ է իշխանությունը ցանկանում դնել համաժողովրդական քվեարկության։

«Ցավում եմ , որ նիստին եկեք եք առանց նախագծին ծանոթանալու,որովհետեւ այն ԱԺ կայքում դրված է»,-ի պատասխան հայտարարեց Վահագն Հովակիմյանը ու սկսեց ընթերցել նախագիծը։

Ապա նա նշեց , թե ինչ վերաբերում է անհավասար պայմաններին, իր ելույթի առանցքային մասն այդ առնչությամբ էր։ Հովակիմյանն ասաց, որ անընդհատ կրկնում է, որ այս ՍԴ-ն կազմավորված չէ 2015 թ. Սահմանադրության 7-րդ գլխին համապատասխան եւ եթե իրավիճակը մնա այսպիսին, այս ՍԴ –ն առաջիկա 15 տարիներին չենք ունենալու։

«Սա է խնդիրը, որ մենք, ի վերջո պիտի ապահովենք, որ մեր Սահմանադրության 7-րդ գլխին համապատասխան ՍԴ ունենանք»,-հայտարարեց Վահագն Հովակիմյանը՝ անպատասխան թողնելով մյուս հարցերը։

«Ես այն մարդը չեմ , որ առանց տեքստին ծանոթանալու մտնեմ դահլիճ, դա հավասարազոր է նրա, որ զինվորը առանց ինքնաձիգի դուրս գա հակառակորդի դեմ»,-ռեպլիկ արեց ԲՀԿ-ական Գեւորգ Պետրոսյանը եւ հետաքրքրվեց, թե 2015թ-ին, երբ Վահագն Հովակիմյանը լրագրող էր, արդյո՞ք վերը նշվածին իր հրապարակումներում անդրադարձել է։

Վահագն Հովհաննիսյանն ասաց, որ 2015 թվականին ոչ թե լրագրող էր, այլ «Ժողովուրդ» օրաթերթի փոխխմբագիրն էր ։ Նա առաջարկեց թերթել «Ժողովուրդ» օրաթերթի համարները եւ տեսնել, թե ինչպես էին մարդիկ Սահմանադրությունն իրենց հագով ձեւում։

Գեւորգ Պետրոսյանն արձանագրեց, որ իր հարցերն անպատասխան մնացին։

Հիշեցնենք, ԱԺ «Իմ քայլը» խմբակցությունն առաջին ընթերցմամբ դեմ է քվեարկելու իր իսկ պատգամավորների նախաձեռնած Սահմանադրությունում փոփոխություններ կատարելու նախագծին, որը առաջարկում է փոփոխության ենթարկել Սահմանադրության 213 հոդվածը ։ Ըստ այդմ, որով առաջարկվում է փաստաթղթի ուժի մեջ մտնելու պահից դադարեցնել մինչև Սահմանադրության 7-րդ գլխի ուժի մեջ մտնելը նշանակված ՍԴ-ի նախագահի ու անդամների պաշտոնավարումը։

Աղբյուր` Փաստինֆո