Փաստ ինֆո

ՀՀ-ում հասարակական կազմակերպությունների դաշտում կա որոշակի մենաշնորհ։ Տպագիր մամուլի խմբագիրների հետ հանդիպման ժամանակ այս մասին ասել է ԱԱԾ նախկին տնօրեն Արթուր Վաենցյանը։

Վերջինս լրագրողներին հայտնել է՝ ստեղծել են «Հայրենիք զարգացման» հիմնադրամ, որի կողմից ֆինանսավորվող ՀԿ-ները, անհատներն ու նաև ԶԼՄ-ները ոչ թե առաջ են բերելու Հայաստանում օտարերկրյա օրակարգ, այլ առաջնորդվելու են ազգային օրակարգով։

«Այն ՀԿ-ները, որոնք գործում են Հայաստանում և ֆինանսավորվում են դրսից, ինչքան էլ ասեն ու պատմեն, որ իրենց գործունեությունն ուղղված է բացառապես Հայաստանի շահերին, դա այդպես չէ։ Ամեն դեպքում ֆինանսավորողը դրսից է, նրանց սպասարկելու են օտարի շահերը և առաջ են բերելու այլ պետությունների օրակարգեր»,-նշեց Արթուր Վանեցյանը։

Ինչ վերաբերում է ԱԱԾ նախկին տնօրենի կողմից ստեղծված հիմնադրամի ֆինանսավորմանը, Արթուր Վանեցյանը նկատեց՝ այդ ուղղությամբ հանդիպումներ է ունեցել մեր հայրենակիցների, մասնավորապես սփյուռքում բնակվող հայերի հետ։ Պատմել է հիմնադրամի նպատակների մասին և նրանցից ստացել հավաստիացում առ այն, որ կաջակցեն հիմնադրամին. «Նրանց բացատրվել է, որ այդ ֆինանսներն ուղղվելու են բացառապես ազգային օրակարգի ձևավորման համար։ Շատ կարևոր հանգամանք կա «Հայրենիք զարգացման հիմնադրամ» ոչ թե բարեգործական հիմնադրամ։ Մենք բարեգործությամբ չենք զբաղվելու։ Մենք զբաղվելու ենք կոնկրետ խնդիրների լուծմամբ»,-ասաց Արթուր Վանեցյանը՝ հավելելով, որ հիմնադրամը շուտով կսկսի ծավալել իր գործունեությունը։
«Հայրենիք» զարգացման հիմնադրամը գրանցվել է շուրջ 1-1.5 ամիս առաջ։

«Առհասարակ բոլոր այն պետությունները, որոնք որդեգրել են ժողովրդավարության սկզբունքը եւ ժողովրդավարական երկրներ են, պետք է ունենան շատ զարգացած եւ ուժեղ քաղհասարակություն: Ինչ-ինչ պատճառներով նախկին իշխանությունների ժամանակ պետությունը մեծ ուշադրություն չի դարձրել քաղհասարակության զարգացմանը, այդ իսկ պատճառով այդ դաշտը գրավել են հասարակական կազմակերպություններ (ՀԿ), որոնք ֆինանսավորվում են դրսից, եւ այդ քաղհասարակության ներկայացուցիչները հիմնականում հանդիսանում են այդ կազմակերպությունների կողմից ֆինանսավորվող ՀԿ-ների ներկայացուցիչներ:

Այսօր՝ հեղափոխությունից հետո, հասարակական կազմակերպությունների դաշտը գրեթե մնացել է դատարկ, որովհետեւ ՀԿ դաշտի շատ ներկայացուցիչներ ներգրավվել են այսօրվա իշխանությունների մեջ: Բացի այդ, ես չեմ վախենա եւ կասեմ, որ որոշակի մենաշնորհ կա Հայաստանի ՀԿ դաշտում, եւ այդ ամենի դեմ ոչ մի բան չունենալով՝ ես որոշեցի, որ մենք պետք է ստեղծենք «Հայրենիք» զարգացման հիմնադրամը եւ աջակցենք քաղաքացիական ակտիվ գործունեություն ծավալող մեր հայրենակիցներին:

Ամենամեծ եւ ամենակարեւոր տարբերությունը, որը տեսնում եմ եւ որի համար որոշել եմ գրանցել «Հայրենիք» զարգացման հիմնադրամը, այն է, որ մեր կողմից ֆինանսավորվող ՀԿ-ները եւ անհատները, նաեւ ԶԼՄ-ները, որոնց աջակցություն ցույց կտանք, Հայաստանում ոչ թե օտարերկրյա օրակարգ առաջ կբերեն, այլ կառաջնորդվեն մեր ազգային օրակարգով: Այսինքն՝ որքան էլ այն ՀԿ-ները, որոնք այսօր գործում են Հայաստանում եւ ֆինանսավորվում են դրսից, ասեն եւ պատմեն մեզ, որ իրենց գործունեությունն ուղղված է բացառապես Հայաստանի շահերին, դա այդպես չէ: Ամեն դեպքում, ֆինանսավորողը դրսից է, եւ ինչ-որ մի պահի նրանք սպասարկելու են օտարի շահերը, եւ առաջ են բերելու այլ պետությունների օրակարգեր: Իսկ ես շատ կարեւորում եմ մեր ազգային օրակարգը, եւ այդ ուղղությամբ փորձելու ենք տանել ակտիվ աշխատանքներ, որպեսզի ձեւավորենք մեր ազգային օրակարգը՝ քաղհասարակության միջոցով»,-հայտարարել է Վանեցյանը:

Աղբյուր` Փաստինֆո