Փաստ ինֆո

Պատկերացրեք այդ փաթեթն ինչքան խնդրահարույց է, որ ինչքան շտկում են, այնքան շտկելու տեղ կա։ Լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԱԺ արտահերթ նիստի վիճահարույց օրակարգի նախագծերին։

Պատգամավորի խոսքով որքան էլ փորձեն փաթեթը շտկել, չի ստացվի, քանի որ դրա էությունը հակասահմանադրական է և պրոբլեմատիկ. «Իրենք էլ են հասկանում, որ շատ պրոբլեմատիկ փաթեթ են բերել և փորձում են ինչ-որ խնդիրներ շտկել։ Թե ինչ խնդիրներ, չգիտեմ, երբ նախագիծը կթարմանա, կնայենք, կտեսնենք։ Նախագիծը լի է բազմաթիվ խնդիրներով։ Երբ մտածում էի՝ ինչ հարց տամ հեղնակին, այնքան հարց ունեմ, որ անհնար է երեք ժամանոց այս փաթեթի և հինգ ժամանոց մեծ փաթեթի քննարկման ժամանակ այդ հարցերը տալ»,-ասաց Էդմոն Մարուքյանը։

Վերջինս նկատեց՝ Սահմանադրության այն հոդվածը, որը քաղաքական մեծամասնությունն ուզում է փոխել, կարող են դա անել խորհրդարանում, սակայն նրանք երկրորդ ընթերցման փաստաթղթեր չեն ներկայացրել, որպեսզի առաջին ընթերցումից հետո տապալեն նախագիծը և այն գնա հանրաքվեի. «Ինչու՞, եթե խորհրդարանը կարող է այդ փոփոխությունն անել այստեղ, ինչու՞ եք ժողովրդին տանում ընտրական տեղամասեր։ Ինչու՞ է պետք քարոզարշավ ունենալ մինչև մայիս և մեկ հոդված փոխելու համար ՀՀ միլիոնավոր քաղաքացիների տանել ընտրական տեղամաս։ Ինչու՞ են Սերժ Սարգսյանին, Ռոբերտ Քոչարյանին և նախկին ռեժիմի ներկայացուցիչներին քարոզարշավի կիջոցով վերակենդանանալու հնարավորություն տալիս»,-ընդգծեց Էդմոն Մարուքյանը։

Էդմոն Մարուքյանի կարծիքով Սահմանադրական դատարանի շուրջ առկա ճգնաժամը սուտ է, բայց եթե անգամ առկա է, ապա չի կարելի ճգնաժամի համար «մատաղ անել» իրավունքի գերակայությունը, Հայաստանի միջազգային վարկը. «Էս իշխանությունն անդադար ինքն իր ոտքի վրա կրակելով է զբաղված և երբ մենք ասում ենք, այ ախպեր ջան, այ գլխիդ ղուրբան ոտքիդ մի կրակի, էս մարդիկ չեն հասկանում։ Քիչ չի չեն հասկանում, հետն էլ ի պատասխան ստանում ենք ամենավատ վիրավորանքներն ու վերաբերմունքը»,-նշեց Էդմոն Մարուքյանը։

Դիտարկմանը՝ արդյոք ԱԺ արտահերթ նիստի չկայանալը պայմանավորված էր ԱԺ նախագահի՝ ԵԱՀԿ և ԵՄ դեսպանների հետ ունեցած հանդիպումով, Էդմոն Մարուքյանն ասաց՝ ենթադրում է, որ ԱԺ նախագահը ներկայացրել է, թե ինչ են ուզում անել, փորձել է դեսպաններին հավաստիացնել, որ ամեն ինչ նորմալ է, բայց նման հանդիպումների ժամանակ դեսպանները լռում են,. «Նրանք չեն ասում՝ համաձայն են, թե ոչ, որովհետև պետության ներքին գործն է, բայց միջազգային պարտավորությունների համատեքստում բնականաբար դեսպանները զեկուցում են իրենց մայրաքաղաքներ, որտեղից երկիրը ստանում է այն իմպուլսները, որը կստանա նման խախտումների, նման սխալ գործընթաց մեկնարկելու պարագայում»,-հավելեց Էդմոն Մարուքյանը։

Աղբյուր` Փաստինֆո