Փաստ ինֆո

«Կազմակերպչական տեսանկյունից Արթուր Վանեցյանը խնդիր չի ունենա եւ շատ արագ կարող է կուսակցություն գրանցել, բայց արդյո՞ք կարող է այն դարձնել աշխատող մարմին եւ ոչ թե զուտ արդարադատության նախարարությունում գրանցված մարմին։ Դա բավականին բարդ է եւ դա է վերջին 30 տարիների ընթացքում Հայաստանի կուսակցական համակարգի լրջագույն խնդիրը»,-«Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով ԱԱԾ նախկին տնօրեն Արթուր Վանեցյանի՝ քաղաքական կուսակցություն ստեղծելու մասին հայտարարությանը։

Ըստ Արմեն Բադալյանի, ԱԱԾ նախկին տնօրենը պետք է ջանքեր գործադրի ապագայում ստեղծվելիք կուսակցությունն աշխատող եւ իշխող քաղաքական ուժին իրական այլընտրանք դարձնելու համար։ «Իր հարցազրույցը հակասական տպավորություն թողեց, կհաջողվի՞ նրան դա, թե ոչ, այս պահին դժվար է ասել։

Այդպիսին դառնալու համար անհրաժեշտ է 2 գործոն՝ մասնագիտական ռեսուրս եւ մեծ ֆինանսական ռեսուրսներ, որովհետեւ կուսակցություն պահելը բավականին ծախսատար է, իսկ աշխատող կուսակցություն պահելը, կուսակցական գործունեություն իրականացնելը, առավել եւս»,-նշեց քաղտեխնոլոգը։

Հիշեցնենք, նախօրեին տպագիր մամուլի խմբագիրների հետ հանդիպմանը Արթուր Վանեցյանը խոսել էր նոր քաղաքական ուժի ձեւավորման անհրաժեշտության մասին, որը կարող է համախմբել և միավորել հասարակության այն լայն հատվածին, որը չի ընդունում այսօրվա իշխանությունների գործելակերպը եւ որի հույսերը չեն արդարացվել։

Նախորդ 30 տարիների ընթացքում , քաղտեխնոլոգի խոսքով, լուրջ խնդիր է եղել այն, որ կուսակցություն ստեղծելը զուտ կազմակերպչական տեսանկյունից պրոբլեմ չէ, առավել բարդ է այդ կուսակցությունն աշխատացնելը։ Քաղտեխնոլոգը նկատում է՝ Հայաստանում կուսակցությունների թիվը հարյուրն անցնում է, սակայն քաղաքական դաշտում փաստացի գործող կուսակցությունները այս պահին 5-ն են՝ ՔՊ, ԼՀԿ, ԲՀԿ, ՀՅԴ, ՀՀԿ։

«Արթուր Վանեցյանը պետք է իր վրա լուրջ աշխատանք կատարի, շատ լուրջ, ինչը ընդգծված բացակայում էր։ Հասարակության մեջ կա այլընտրանքային բեւեռի ձեւավորման պահանջարկը, որովհետեւ հեղափոխական էյֆորիան անցել է, որպես իշխող քաղաքական ուժին հիմնական մրցակից ուժերը խորհրդարանական ուժերը՝ Լուսավորն ու Բարգավաճը չեն ընկալվում, Բարգավաճը համեմատաբար ընկալվում է, բայց ոչ այնքան, որքան իշխող ուժի ղեկավարի վարկանիշն է, իսկ խորհրդարանից դուրս բեւեռները 2-ն են ՀՀԿ-ն ու ՀՅԴ-ն, բայց ՀՀԿ-ն չի կարող իշխող ուժին այլընտրանք դառնալ, որովհետեւ վերջին 10 տարվա ընթացքում նրա վարած քաղաքականության արդյունքում էր, որ ատելություն ձեւավորվեց հենց ՀՀԿ-ի նկատմամբ եւ չմոռանանք, որ ՀՀԿ-ն չի փոխել իր ղեկավարին, այն մարդուն, որին, հասարակությունը քայլ անելով մերժում էր։ Դա ՀՀԿ-ի կոպտագույն սխալն է»,-ասաց քաղտեխնոլոգը։

Ըստ Բադալյանի, այս փուլում Դաշնակցությունը եւս որպես այլընտրանք չի կարող ընկալվել, որովհետեւ ի տարբերություն շատ կուսակցությունների, այն գաղափարական կուսակցություն է, իսկ հայդատականությունը միշտ չէ, որ կարող է գրավիչ լինել հասարակության մեծամասնությանը։
Նշենք, որ Արթուր Վանեցյանը նաեւ հայտարարել էր , թե շատ լավ գիտի այն մտահոգությունները, որոնք կիսում են մեր քաղաքացիները՝ բակերում, աշխատավայրերում, իրենց ընկերական հանդիպումների ժամանակ։

Քաղտեխնոլոգը շեշտեց՝ Արթուր Վանեցյանը չպետք է աշխատի միայն իշխանությունից դժգոհ հատվածի վրա, նա, ըստ քաղտեխնոլոգի, պետք է աշխատի ամբողջ էլեկտորատի վրա, որը համապատասխան ջանքերի դեպքում կարող է թեքվել իր կողմը։

«Եթե դիտարկում ենք Հայաստանի ընտրազանգվածային կոնֆիգուրացիան, կարող ենք ասել, որ ԱԱԾ նախկին տնօրենը այն գործիչն է, որը կարող է մեծ ընտրազանգվածային խումբ հավաքել, բայց դրա համար նա պետք է լրջագույն աշխատանք տանի իր վրա, հակառակ դեպքում նաեւ իշխանությունից դժգոհ ընտրազանգվածային խումբը նրա կողմը չի գնա», եզրափակեց քաղտեխնոլոգը։

Աղբյուր` Փաստինֆո