Փաստ ինֆո

Ափսոս ենք մենք էսքանով, որ քննարկում ենք ինչ-որ մարդկանց հարց։ ԱԺ-ում Սահմանադրության փոփոխության վերաբերյալ նախագծի քննարկման ժամանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը։

«Պարզ է, որ այսօր ամենահեշտը հանրապետականներին հիշելն է։ Այսօր ամենահեշտը նրանց հայհոյելն է, նրանց հասցեին ասել ամեն ինչ։ Պարզ է, որ հեշտ է անդադար մեղադրել նախկիններին, բայց երկու տարի անցել է և կան ներկաները, այսօրվանները և ակնկալիքներն այսօրվաններից է։ Պարզ է, որ շատ դժվար է որևէ կերպ փորձել մեզ՝ նրանց, ովքեր համաձայն չեն իրականացվող գործընթացի հետ, դիտարկել որպես Հրայր Թովմասյանի կամ նախկինների պաշտպան։ Ես, երբ այս շենքում յոթ տարի կռիվ էի անում Հրայր Թովմասյանի հետ, այսօրվա շատ հեղափոխականներ Հրայր Թովմասյանի շեֆերի աշխատակիցներն էին»,-ասաց Էդմոն Մարուքյանը։

Նա ընդգծեց՝ սխալ քայլ են անում։ Պատգամավորի խոսքով գործընթացն ի սկզբանե հակասահմանադրական է, ինչն արձանագրվել է։ Էդմոն Մարուքյանի վստահեցմամբ հակասահմանադրական է նաև Սահմանադրության այս փոփոխությունը. «Արվում է նման քայլ քաղաքական խնդիր լուծելու համար, ընդ որում դա իշխանության քաղաքական խնդիրն է, ժողովրդի քաղաքական խնդիրը չէ։Անդադար ասել, որ սա ժողովրդի խնդիրն է, չի ստացվում, որովհետև այն դատավորները, այն դատարանները, որոնք այստեղ նստած մարդկանց են բանտարկել, որոնք կառավարությունում նստած մարդկանց են բանտարկել, նրանց հետ բոլորդ համերաշխ եք։ Նրանց հետ կապված երկու տարի որևէ հարց չեք բարձրացրել։ Ի՞նչա եղել, գրիչի պատմությու՞նն է, ինչի՞ եք խառնվել»,-հավելեց Էդմոն Մարուքյանը։

Աղբյուր` Փաստինֆո