Փաստ ինֆո

Լավ եք անում, որ պայքարում եք, բայց օրենքով պայքարեք։ Օրենքի խախտումները մի՛ կուտակեք Ձեր վրա, որ հետագայում Ձեր իսկ օրենքի խախտումներով սկսվի մի գործընթաց, որի տուժողը ՀՀ-ն է։ ԱԺ-ում Սահմանադրության փոփոխության վերաբերյալ նախագծի քննարկման ժամանակ ասաց «Լուսավոր Հայաստան» խմբակցության պատգամավոր Տարոն Սիմոնյանը։

Վերջինս նկատեց՝ Վահագն Հովակիմյանի ելույթում որևէ իրավական հիմնավորում չի տեսել. «Այո լրագրողական և ինչ-որ առումով որոշակի պատմական ելույթ էր։ Արդյո՞ք մենք պատմական կամ լրագրողական ելույթներով կարող ենք հիմնավորել Սահմանադրական փոփոխությունները։ Պայքարը, նպատակը հասկանալի է, բայց արդյոք այն միջոցներն ու մեթոդները, որոնք Ձեր կողմից օգտագործվում են, մակերեսային չեն»,-նշեց Տարոն Սիմոնյանը։

Նա ընդգծեց, որ առաջին՝ ընթացակարգային  խախտումն առավոտյան տեսան. «Բարձրաձայնեցինք, բացատրեցինք, 1-ին կուրսի իրավաբանի մակարդակով բացատրեցինք, չեք ուզում ընկալեք։ Ինչու՞մն է պատճառը, մի՞թե կարելի է նման մակերեսային վերաբերմունք դրսևորել սահմանադրական փոփոխությունների հետ կապված»,-ասաց Տարոն Սիմոնյանը։

Պատգամավորը նկատեց՝ այս նախագիծը հակասահմանադրական իրավիճակ է ենթադրում, որ միանգամից յոթ դատավոր դուրս գա։ Տարոն Սիմոնյանն ընդգծեց, որ այս անցումային դրույթը կիրառված է և եթե ցանկանում էին այս խնդիրը լուծել, անցումային դրույթին չպետք է կպնեին. «Պետք է կպնեիք 7-րդ գլխում մի որևէ դրույթ ավելացնեիք և այս խնդիրը լուծեիք։ Դուք իրավաբանական տեխնիկայի առումով ամենավատ լուծումն եք ընտրել, որովհետև արդեն իսկ կիրառված անցումային դրույթը չի կարելի փոփոխել։ Նորմատիվ իրավական ակտերի մասին օրենքը կարելի է ընդամենը կարդալ։ Ասում եք՝ տապալելու եք առաջին ընթերցումը և դրանից հետո հանրաքվեի է դրվելու։ Հարգելիներս, Ձեր ցավը տանեմ, կարելի է չէ Սահմանադրության 202-րդ հոդվածի 3-րդ մասը կարդալ, հետո մի հատ էլ բացել ԱԺ կանոնակարգ օրենքի 86-րդ հոդվածի 4-րդ մասի 2-րդ կետը կարդալ հասկանալու համար, որ առաջին ընթերցման տապալումից հետո չեք կարող այս հարցը հանրաքվեի դնել։ Կարգավորումն ԱԺ կանոնակարգ օրենքում տրված է։ Գրված է՝ առաջին ընթերցումը պետք է հաստատեք, որից հետո պետք է գնա ՍԴ, ՍԴ-ի դրական եզրակացությունից հետո երկրորդ ընթերցման ժամանակ բացասական քվեարկեք։ Դրա արդյունքում նոր կարող եք հանրաքվեի հարց բարձրացնեք։ Կարելի է չէ այս ամեն ինչը կարդալ»,-ասաց Տարոն Սիմոնյանը՝ կես կատակ կես լուրջ հավելելով, որ եթե մասնավոր ոլորտում լիներ, այսքան խորհրդատվության համար բավականին կհարստանար, իսկ իշխանական գործընկերների կողմից որևէ բան չի ստանում, միայն բացասական ժպիտներ։

Աղբյուր` Փաստինֆո