Փաստ ինֆո

«Սասնա Ծռեր-1» գործով ամբաստանյալ Պավել Մանուկյանն այսօր դատական նիստում դժգոհեց, որ դատարանը չի անդրադառնում իրեն վնասազերծելու դեպքին և դիմելով գործով նախագահողին հետաքրքրվեց, թե արդյո՞ք պատրաստվում է նախաքննական մարմնից պահանջել իրեն վնասազերծելու տեսանյութը։

«Ինչ պայմաններում են ինձ վնասազերծել, դրան դատարանն ընթացք չի տվել։ Ինչ հանգամանքներում և ինչի համար են ինձ վնասազերծել։ Չկա խփելու տեսարանը, տեսանյութերը չկան։ Այն ժամանակ Ինեսսա Պետրոսյանը միջնորդել էր դրա վերաբերյալ»,- ասաց Մանուկյանը՝ հավելելով, որ ոչ միայն իրեն վնասազերծելու, այլև՝ որդու՝ Արամ Մանուկյանի վնասազերծելու հանգամանքներին դատարանը պետք է անդրադառնա։ Նախագահող դատավոր Մեսրոպ Մակյանն ասաց, որ սույն դատաքննությանն այդ միջնորդությունը չի կարող քննության առարկա դառնալ, քանի որ դա այլ դեպքով հարուցված քրեական գործ է։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ ՝ Իզաբել Սահակյան

Աղբյուր` Փաստինֆո