Փաստ ինֆո

«Ես  ձեռնպահ կմնամ իրավաչափության  տեսանկյունից դիտարկել տվյալ նախագիծը, դա միմիայն քննարկման առարկա է Քրեական օրենսգրքի  շրջանակում»,-«Փաստինֆո»-ի հետ զրույցում ասաց փաստաբան, ՍԴ նախագահ Հրայր Թովմասյանի փաստաբանական խմբի անդամ Միհրան Պողոսյանը` անդրադառնալով իշխող «Իմ քայլը» խմբակցության թվով 37 պատգամավորների հեղինակած օրենսդրական նախաձեռնությանը։

«Կոնկրետ դեպքում ՝ իշխանությունը զավթելու, մասնավորապես, ՍԴ լիազորություններին տիրանալու միջոց է հանդիսանում  տվյալ նախագիծը։ Այն ամբողջությամբ տեղավորվում է Սահմանադրական դատարանի լիազորություններին տիրանալու հանցակազմի մեջ»,-բացատրեց փաստաբանը ։

Հիշեցնենք, ժամեր առաջ շրջանառության մեջ դրված «ՀՀ Սահմանադրությունում փոփոխություն կատարելու մասին» օրենքի նախագիծն առաջարկում է փոփոխության ենթարկել Սահմանադրության 213-րդ հոդվածը / Սահմանադրական դատարանի անդամների եւ նախագահի պաշտոնավարումը/։ Առաջարկվող խմբագրությամբ տվյալ հոդվածը նախատեսում է  մինչեւ Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի եւ անդամների պաշտոնավարումը դադարեցնել։

Սա նշանակում է, որ այս օրինագծի ընդունումից հետո դադարեցվում են ՍԴ  9 դատավորներից 7-ի լիազորությունները եւ ՍԴ-ում պաշտոնավարում եմ միայն Վահե Գրիգորյանն ու Արման Դիլանյանը։

Միհրան Պողոսյանի խոսքով, իշխանությունը, տեսնելով, որ  այլ տարբերակ չունի՝ ազատվելու  իշխանության մյուս ճյուղից, ակնհայտ քրեական հանցագործության  է գնում։

«Համոզված եղեք, պատմությունը իր գնահատականը տալու է, բոլոր հանցագործները ենթարկվելու են քրեական  պատասխանատվության , իսկ եթե այդպես չլինի, կշեռքի հաջորդ նժարին դրված է ՀՀ՝  որպես իրավական պետության ապագան»,-եզրափակեց փաստաբանը։

Հավելենք, որ նախագծի հիմնավորման մեջ նշվում է , որ ՍԴ ներսում եւ դրա շուրջ առկա ճգնաժամն այս պահին ունի մի քանի ասպեկտ, որոնք ըստ հեղինակների, լրջագույն մարտահրավեր են Հայաստանի ժողովրդավարության, ինքնիշխանության եւ իրավական որակների համար: «Սույն փոփոխության նպատակը ՀՀ Սահմանադրական դատարանի (այսուհետ ՍԴ) կազմի սահմանադրականության եւ դրա նկատմամբ հանրության եւ իշխանության ճյուղերի կողմից վստահության բացակայության ճգնաժամերի հանգուցալուծումը եւ 2015թ.-ի փոփոխություններով ՀՀ Սահմանադրության (այսուհետ Սահմանադրություն) 7-րդ գլխի կանոններով նախատեսված Սահմանադրական դատարանի ձեւավորումն է:
Հաջորդ խնդիրը ՍԴ դեմոկրատական լեգիտիմության դեֆիցիտն է, որում ՍԴ-ն ունի ուղղակի պատասխանատվության իր բաժինը՝ նախագահական եւ խորհրդարանական ընտրություններում ընտրական իրավունքի եւ ժողովրդի կողմից իր իշխանությունն ընտրելու երաշխիքների շարունակական անտեսման պատճառով հօգուտ օրվա իշխանության: Սա կործանարար ազդեցություն է ունեցել քաղաքացիների եւ հանրային իշխանության մարմինների կողմից ՍԴ նկատմամբ ունեցած վստահությունը կորցնելու հարցում, ինչն անթույլատրելի վիճակ է սահմանադրական արդարադատության մարմնի համար: Իրողություն է, որ ՍԴ-ն այս պահին իր անդամների կազմով ամենացածր հեղինակություն վայելող հանրային իշխանության մարմիններից է եւ այդ հեղինակության վերականգնումն անհնար է նույն կազմի պահպանման դեպքում»,-նշվում է նախագծի հիմնավորման մեջ:

Աղբյուր` Փաստինֆո