Փաստ ինֆո

Տնտեսական մրցակցության պաշտպանության հանձնաժողովը վարչական վարույթ է հարուցել շաքարավազի շուկայում մասնակցություն ունեցող մի խումբ ընկերությունների նկատմամբ։ Հանձնաժողովը կասկածներ ունի, որ նրանք չարաշահել են իրենց մրցակցային դիքը։ 

Խոսքը մասնավորապես իրականացվող գնային քաղաքականության մասին է։ Հանձնաժողովը կասկածներ ունի մեծածախ և մանրածախ իրացման ոլորտում չհիմնավորված գներ կիրառելու հետ կապված։ Շաքարավազի մեծածախ իրացման ժամանակ տարբեր ընկերությունների համար կիրառվել են տարբերակված գներ, ինչը լուրջ ռիսկեր է պարունակում անհավասար մրցակցային դաշտի ստեղծման առումով։

Մանրածախ շուկայում կիրառվել են այսպես կոչված, դեմպինգային գներ։ Երբեմն շաքարավազը վաճառվել է նույնիսկ ինքնարժեքից ավելի ցածր։ Սա ամենավտանգավոր երևույթն է, որը տանում է շուկայի կենտրոնացման և այնտեղից փոքր խաղացողների դուրսմղման։

Հաշվի առնելով առկա կասկածները՝ Հանձնաժողովը թիրախավորել է 8 ընկերության։ Դրանք են՝ «Ալեքս Հոլդինգը», «Ալեքս ընդ Հոլդինգը», «Արմեն-Համիկ Հ/Ձ»-ն «Սիթի», «Նոր Զովք», «Էվրիկա Գրուպ», «Մաջիդ Ալ Ֆութաիմ հայփերմարքեթս էյ-էմ», «Սաս Գրուպ» սահմանափակ պատասխանատվությամբ ընկերությունները։

Նշենք, որ շաքարավազի շուկան խիստ կենտրոնացված է։ Թեև ներմուծման ոլորտում հանդես են գալիս 47 ընկերություններ, այնուհանդերձ նրանց մեծ մասի մասնակցությունն այստեղ ձևական բնույթ է կրում։

Շուկայի հիմնական ներմուծողները, 3 ընկերություններ ընկերություններ են, որոնցից երկուսը փոխկապակցված են։ Խոսքը՝ գործարար Սամվել Ալեքսանյանին պատկանող «Ալեքս Հոլդինգի» և «Ալեքս ընդ Հոլդինգի» մասին է։ Երրորդ խոշոր ներմուծողը՝ «Արմեն-Համիկ Հ/Ձ»-ն է։

Մյուսների մասնակցությունը շատ փոքր է կամ նրանք շաքարավազ են ներկրում զուտ ներքին արտադրական կարիքների համար։ Այսինքն՝ առևտրային նպատակ չեն հետապնդում։

Աղբյուր` Փաստինֆո