Փաստ ինֆո

Երևանի ընդհանուր իրավասության դատարանում՝ դատավոր Մեսրոպ Մակյանի նախագահությամբ, շարունակվում է «Սասնա ծռեր-1» գործի քննությունը։
Նշենք, որ դատաքննությունը մոտենում է ավարտական փուլում եւ կողմերը ներկայումս քննարկվում են դատաքննությունը լրացնելու վերաբերյալ միջնորդությունները։ «Փաստինֆո»-ի հաղորդմամբ՝ այս պահին դատարանը քննարկում է Սմբատ Բարսեղյանի նախկին պաշտպան Հայկ Ալումյանի 29.11.2017թ.-ին ներկայացրած միջնորդությունը, որով պաշտպանը միջնորդել էր սույն գործով դիմել ՍԴ ՝ պարզելու ՀՀ ՔՕ 8-րդ գլխի ՀՀ Սահմանադրության համապատասխանությունը։

Ամբաստանյալ Բարսեղյանը և պաշտպանական կողմը միացան ներկայացված միջնորդությանը։ Պաշտպան Եգորյանը նշեց, որ նույնաբովանդակ միջնորդություն է պատրաստվում ներկայացնել նաեւ ինքը։ Մեղադրող դատախազ Պետրոս Պետրոսյանն ասաց, որ բարձրացված հարցը վերաբերում է ՀՀ ՔՕ 8-րդ գլխին և շատ վերացական է նշված։ Նրա խոսքով՝ միջնորդությամբ հիմնավորված չէ, թե Սահմանադրության որ նորմի հետ կարող է հակասության մեջ լինել սույն նորմը։ Ըստ Պետրոսյանի՝ տվյալ պայմաններում, ՔՕ-ում պետք է զետեղվեին արարքի հանցավորությունը բացառող հանգամանք, որն անհիմն է։

Դատարանը հեռացավ խորհրդակցական սենյակ՝ քննարկելու ՍԴ դիմելու վերաբերյալ միջնորդությունը։ Դատարանի որոշումը կհրապարակվի այսօր։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ ընդհանուր առմամբ մեղադրվում է 32 անձ:

Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Աղբյուր` Փաստինֆո