Փաստ ինֆո

ՀՀ գլխավոր դատախազությունն ստացել է ԱԺ նախկին նախագահ Արա Բաբլոյանի գործը։ «Փաստինֆո»-ի հարցին ի պատասխան այս մասին ասաց Գլխավոր դատախազի խորհրդական Գոռ Աբրահամյանը։

Նշենք, որ հունվարի 31-ին Արա Բաբլոյանի գործով երկրորդ անգամ նախաքննության ավարտ գրանցվեց։ «Փաստինֆո»-ի հետ զրույցում Արա Բաբլոյանի պաշտպան Արամ Վարդևանյանը նշել էր՝ չի կարող ասել, որ որպես այդպիսին լրացուցիչ քննություն տեղի ունեցել է։ Պաշտպանի պնդմամբ մեղադրանքի տեսանկյունից որևէ նոր ապացույց կամ հանգամանք առկա չէ, բայց նույն մեղսագրվող արարքով կրկին նախաքննության ավարտ է հայտարարվել։

Արամ Վարդևանյանը վերահաստատեց, որ Արա Բաբլոյանի դեմ չկա որևէ ապացույց, ինչպես նաև նրա դեմ չկա ցուցմունք: Հակառակ պարագայում պաշտպանի խոսքով կոնֆրոնտացիայի իրավունքի հարց կառաջանար:

Նշենք, որ փետրվարի 1-ին՝ առավոտյան, Արամ Վարդևանյանը վարույթն իրականացնող մարմնին միջնորդություն էր ներկայացրել՝ քրեական հետապնդումը դադարեցնելու վերաբերյալ, որը ՀՔԾ-ն նույն օրը երեկոյան մերժել էր։ Պաշտպանի խոսքով մոտ 30 էջ միջնորդությանը ՀՔԾ-ն պատասխանել է 4 էջի սահմաններում, որում Արամ Վարդևանյանի պնդմամբ չկա միջնորդությունը մերժելու որևէ հիմնավորվածություն։

Հիշեցնենք, ԱԺ նախկին պատգամավոր Արման Բաբաջանյանի դիմումի հիման վրա, հոկտեմբերի 28-ին ՀՔԾ-ում հարուցված քրեական գործի շրջանակում մեղադրանք էր առաջադրվել ԱԺ նախկին նախագահ Արա Բաբլոյանին՝ ՀՀ քրեական օրենսգրքի 300-րդ և 314-րդ հոդվածների հատկանիշներով՝ Սահմանադրական դատարանի լիազորություններին տիրանալու եւ պաշտոնական կեղծիքի համար։

2019թ դեկտեմբերի 24-ին դատախազությունը ԱԺ նախկին նախագահ Արա Բաբլոյանի և ԱԺ աշխատակազմի ղեկավարի նախկին տեղակալի պաշտոնակատար Արսեն Բաբայանի գործով որոշում էր կայացրել մեղադրական եզրակացությունը չհաստատելու և քրեական գործը լրացուցիչ քննություն կատարելու համար վերադարձնելու մասին։

Հեղինակ՝ Հասմիկ Կոշկարյան

Աղբյուր` Փաստինֆո