Փաստ ինֆո

Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, բավարարեց «Սասնա Ծռեր-1» գործով ամբաստանյալներ Պավել Մանուկյանի և Արմեն Բիլյանի պաշտպան Զարուհի Փոստանջյանի միջնորդությունը, որով վերջինս խնդրել էր գործով տուժող Գագիկ Մկրտչյանի հիվանդության պատմագիրը վերցնել բուժհաստատությունից կամ ՀՔԾ-ից։ 

Պաշտպանի խոսքով՝ դատաքննությունը լրացնելու համար անհրաժեշտություն է առաջացել հետազոտել տուժող Գագիկ Մկրտչյանի հիվանդության պատմությունը։ «Իրարամերժ ցուցմունքների առկայության պայմաններում հնարավոր է այլ փաստեր առաջ գան»,- ասաց պաշտպանը։

Բացի այդ՝ Փոստանջյանը միջնորդել էր , որ դատարան հրավիրվել նաև տվյալ բուժհաստատության վիրաբույժները, որոնք վիրահատել կամ բուժօգնություն են ցուցաբերել գագիկ Մկրտչյանին։ Տուժողի իրավահաջորդը՝ Գագիկ Մկրտչյանի կինն առաջարկեց, որ ոչ միայն վիրաբույժները, այլև՝ բուժքույրերը ներկայանան դատարան և պատասխանեն մեղադրող և պաշտպանական կողմի հարցերին։ Մեղադրող դատախազ Պետրոս Պետրոսյանը չառարկեց, սակայն նշեց, որ նպատակը կարող է այլ լինել։

Դատարանը 2-3 օրվա ընթացքում կդիմի ՀՔԾ՝ Գագիկ Մկրտչյանի հիվանդության պատմագիրը ստանալու համար։

Հիշեցնենք, որ «Սասնա Ծռերի» անդամները մեղադրվում են 2016 թ. հուլիսի 17-ին զանգվածային անկարգություններ կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու եւ պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու եւ դիտավորությամբ ոչնչացնելու մեջ։ Զինված հարձակման հետևանքով զոհվեցին գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը։ Պատանդ վերցված ոստիկանների թվում էին այն ժամանակվա Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը։ ՊՊԾ գունդը զավթելու եւ նշված այլ արարքները կատարելու մեջ ընդհանուր առմամբ մեղադրվում է 32 անձ:
Ի սկզբանե գործը մեկ վարույթով էր ուղարկվել դատարան, որը մակագրվել էր Էրեբունի-Նուբարաշեն վարչական շրջանների դատարանի դատավոր Արտուշ Գաբրիելյանին, սակայն նիստերի անցկացումը երբեմն դառնում էր անհնարին եւ գործը բաժանվեց երեք մասի։ «Սասնա Ծռեր» գործից տասը հոգու՝ Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի և Էդվարդ Գրիգորյանի վերաբերյալ առանձին վարույթում անջատված գործը մակագրվել է հիշյալ դատարան գործուղված դատավոր Մեսրոպ Մակյանին՝ ստանալով «Սասնա ծռեր-1» պայմանական անվանումը։

Դատաքննության ընթացքում՝ 2018 թվականի հոկտեմբերին, խմբի անդամ, ազատամարտիկ Արայիկ Խանդոյանը, ով հայտնի է որպես «Միայնակ Գայլ», մահացել է։ «Սասնա Ծռեր-2» գործը՝ 11 ամբաստանյալի վերաբերյալ, ընդունվել է դատավոր Արթուր Օհանյանի վարույթ: Իսկ երրորդ գործով դատավորը՝ ընդհանուր առմամբ 11 ամբաստանյալի մասով, մնացել է Արտուշ Գաբրիելյանի վարույթում։ Նշենք, որ սպանության համար մեղադրանք է առաջադրվել խմբի անդամներ, սույն գործով ամբաստանյալ Արմեն Բիլյանին, Սմբատ Բարսեղյանին։

Հեղինակ՝ Իզաբել Սահակյան

Աղբյուր` Փաստինֆո