Փաստ ինֆո

ՀՀ երկրորդ նախագահ Ռոբերտ Քոչարյանի պաշտպանական խումբը Ռոբերտ Քոչարյանի նկատմամբ քրեական հետապնդումը դադարեցնելու վերաբերյալ միջնորդություն ներկայացրեց։ Պաշտպան Հովհաննես Խուդոյանի դիտարկմամբ՝ դատախազությունն ակնկալում է, որ նույն դեպքերի վերաբերյալ կլինեն տարբեր, հակառակ մոտեցումներ՝ անդրադառնալով 2008 թ. մարտի 1-ի իրադարձությունների վերաբերյալ հարուցված քրեական գործին։ Նրա խոսքով՝ հաստատվել են որոշակի փաստեր, օրինակ՝ որ ցույցերի ժամանակ եղել են մարդիկ, ովքեր խաղաղ չեն եղել և կիրառել են զենքեր, մեղադրական եզրակացությունը չի կարող պարունակել այնպիսի պնդումներ, ինչպիսիք են խաղաղ ցույցեր ցրել։ Վերջինս նշեց, որ քրեական հետապնդման պահից սկսված բազմիցս խախտվել են անմեղության կանխավարկածները և կիրառվել են ոչ իրավաչափ գործիքներ, օրինակ՝ գույքի վրա կալանք դնելը, խափանման միջոցը։ Ըստ Խուդոյանի՝ չեն տրամադրվել գործի ամբողջ նյութերը։ Նրա խոսքով՝ հրապարակային, դատական ակտերով պարբերաբար խախտվել են ամբաստանյալների իրավունքները, իսկ անմեղության կանխավարկածի սկզբունքը վերացել է Հայաստանում, որի հիմքը դրել է ՀՔԾ պետ Սասուն Խաչատրյանը։

Պաշտպանական խմբի անդամ Արամ Օրբելյանը լրացրեց Խուդոյանի միջնորդությունը՝ նշելով, որ դատական ակտով հաստատվել է անմեղության կանխավարկածի խախտումը ՀՔԾ-ի կողմից և Սասուն Խաչատրյանն առ այսօր շարունակում է պաշտոնավարել՝ խախտելով անմեղության կանխավարկածը։ Ընդ որում՝ հայտարարություններ է անում նաև այլ գործերով։ Օրբելյանի խոսքով՝ մարդու իրավունքների խախտմամբ վարույթը չի կարող առաջ գնալ և պահանջում են, որ այդ խախտումները վերացվեն։

Պաշտպան Խուդոյանը նշեց, որ անմեղության կանխավարկածի խախտումն ի սկզբանե կանխորոշել է գործի ընթացքը։ Նրա խոսքով՝ գործով ամբողջական քննություն իրականացնելու նպատակ չկա և գործի միակողմանի քննությունը, ամբաստանյալի իրավունքների և պաշտպանության իրավունքների խախտումները կատարվել են, որովհետև նշանակված են անձինք, կազմված են մեղադրանքներ և պետք է, որ այդ անձինք ենթարկվեն պատասխանատվության։ Ըստ Խուդոյանի՝ մեղադրանքում այնպիսի նորմ է կիրառվել,որը չի վերացվում վաղեմության ժամկետով, բացի այդ՝ ընտրվել է ամենախնդրահարույց կետը, քանի որ խախտվում են իրավունքները։ Վերջինիս խոսքով՝ սույն գործով մեղադրանք է առաջադրվել ՀՀ ՔՕ 300.1-րդ հոդվածով, որն ընդունվել է մարտի 1-ի իրադարձություններից մոտ մեկ տարի անց, ինչը նշանակում է, որ այն չի կարող ունենալ հետադարձ ուժ, քանի որ անձը կարող է հետապնդվել արարքի կատարման պահին գործող քրեական օրենսգրքի նորմերով։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Աղբյուր` Փաստինֆո