Փաստ ինֆո

Ինձ համար ակնհայտ զավեշտալի է Ռուբեն Հայրապետյանի բերման ենթարկումն, այն դեպքում, երբ Հայրապետյանը մի քանի անգամ հրապարակավ հայտարարել է, որ եթե իրեն Ոստիկանություն կամ ԱԱԾ հրավիրելու խնդիր կա, ապա բենզին, վառելիք, ջանքեր, մեքենայի անիվ ծախսել պետք չէ, կարող են զանգել իրեն, ինքը կգա։ Այս մասին այսօր լրագրողների հետ ճեպազրույցում ասաց «Հայաստանի հանրապետական» կուսակցության խոսնակ Էդուարդ Շարմազանովը։

Նրա խոսքով, ակնհայտ է, որ այս գործողությունների նպատակը վախի մթնոլորտ սերմանելն է. «Մենք այստեղ ենք, ոչ ոքից չենք վախենում, առավել ևս Նիկոլ Փաշինյանից։ Այս «մասկի շոուները» պետք է մի օր ավարտ ունենան։ Սա զավեշտալի է»։

Դիտարկմանը, թե Ոստիկանությունից հայտնում են ապօրինի զենք-զինամթերք կրելու համար են Հայրապետյանին բերման ենթարկել, Շարմազանովը պատասխանեց. «Գիտեք ինչ կա, ցանկացածիս դեպքում, ապօրինի զենք-զինամթերքից մինչև նարկոտիկի համար կարող են պատճառաբանել, բերման ենթարկել, վերջում ասել. «վայ, կներեք, չկա ոչինչ» »։

Շարմազանովը շեշտեց, որ հնարավոր է զենք-զինամթերք գտնեն Հայրապետյանի մոտ, բայց վստահաբար դա օրինական կլինի։

«Վստահ եմ, որ անօրինական բան չի կարող լինել, որովհետև եթե գնացել են տուն, տանը փնտրել են, չեն գտել..․ես վստահ եմ, որ սա «մասկի շոու» է, որը հրահանգված է երկրի գործադիրի ղեկավարի կողմից»,-ասաց ՀՀԿ խոսնակը։

Նրա կարծիքով, Ռուբեն Հայրապետյանին բերման են ենթարկել, որպեսզի քողարկեն Փաշինյանի կողմից ՀԴՄ-ի վերաբերյալ գրառումը։ Ըստ Շարմազանովի, նպատակներից մեկն էլ ՍԴ-ի շուրջ միջազգային կառույցների հայտարարություններից հանրության ուշադրությունը շեղելն է։

Հիշեցնենք, որ ոստիկանության լրատվության ծառայությունից տեղեկացրել են, որ ՀՖՖ նախկին նախագահ Ռուբեն Հայրապետյանը բերման է ենթարկվել ապօրինի զենք-զինամթերք պահելու կասկածանքով։

Աղբյուր` Փաստինֆո