Փաստ ինֆո

Կինոռեժիսոր Արշակ Զաքարյանը ֆեյսբուքյան ուղիղ եթերում պատմել է ՀՀ վարչապետ Նիկոլ Փաշինյանի կողմից Արցախում գտնվող իր ռեստորանում բարձրացված սկանդալի մասին։

Կինոռեժիսորը պատմում է՝ ՀՀ վարչապետն ու նրա ընտանիքը կիրակի Արցախ էին գնացել՝ տեսակցելու բանակում գտնվող իրենց որդուն։ Վարչապետն ընտանիքի հետ ճաշել է կինոռեժիսորին պատկանող ռեստորանում, իսկ վերջում ՀԴՄ կտրոն է պահանջել, սակայն աշխատակիցները տեսել են՝ ՀԴՄ սարքը չի աշխատում։ Վերջիններս տեղեկացրել են վարչապետին, սակայն նա աշխատակիցներին մեղադրել է «զինվորի հաց ուտելու» մեջ. «Արցախի հարկային օրենքով մենք հաստատագրված հարկ ենք վճարում, այսինքն ՀԴՄ չխփելու իմաստ գոյություն չունի։ Անկախ ինչքան ՀԴՄ կխփենք, մեր հաստատագրված վճարը նույնն է։

Այդ ամենը բացատրում ենք վարչապետին, նա ամպագոոռգոռ, իրեն հատուկ մանիպուլյատիվ ձևով ասում է՝ ճիշտ են ասում, որ դուք զինվորի հաց ուտող եք։ Ես և իմ ընկերները շատ չեմ խորանա՝ ինչեր ենք արել, բայց մենք դարձանք «զինվորի հաց ուտող» հա՞։ Մենք դարձանք զինվորի հաց ուտող, «Իմ քայլը», «Քաղաքացիական պայմանագիր»-ն էլ զինվորին հաց տվողներն են հա՞։ Ես չեմ ցածրանա էդ մակարդակին, չեմ իջնի այդ մակարդակին։ Այսօր չեմ խոսի, թե ինչ են կերել, երբ են կերել, դա ցանկացած հաճախորդի անձնական ինֆորմացիան է։ Չեմ կիսվի մնացած մանրամասները, չեմ խոսի ընտանիքի մասին, Աշոտիկը որպես զինծառայող, քանի որ ներկա էր այդ միջադեպին, մինչ այդ էլ, քանի անգամ որ եկել է, նրան մոտեցել ու ասել են՝ զինվորականներն այստեղ ունեն զեղչ։ Մենք անխտիր բոլոր զինծառայողների համար զեղչ ունենք։ Նույնը երեկ ասել ենք նաև պարոն վարչապետին, որ Ձեզ հետ զինվոր կա, Ձեզ տրվում է այդ 10 տոկոս զեղչը։ Այդ ամենից հետո նման աղմուկ բարձրացնել, մեզ անվանել «զինվորի հաց ուտող» դա վայել չէ բարձրաստիճան պաշտոնյային , ՀՀ վարչապետին, դա վայել չէ ընդհանրապես տղամարդուն»,-ասաց Արշակ Զաքարյանը։

Վերջինս հավելեց՝ վարչապետը զանգահարել է Արցախի պետնախարարին և պահանջել, որ նրանք զբաղվեն այս հարցով։ Կինոռեժիսորը նկատեց՝ այս մասին չէր խոսի, եթե չլիներ վարչապետի՝ «զինվորի հաց ուտող» արտահայտությունը։ Արշակ Կարապետյանն ընդգծեց՝ իրենք զինվորին հաց տվողներ եղել են և կմնան. «Դուք Ձեր մասին մտածեց պարոն վարչապետ, թե Դուք ինչպես եք եկել, ինչ եք անում, ինչ եք ուտում, ինչ եք ծախսում, ինչ պարգևավճարներ եք տալիս։ Դա թողնում եմ ժամանակի և պատմության դատին»,-հավելել է կինոռեժիսորը։

Նշենք, որ այսօր ՀՀ վարչապետ Նիկոլ Փաշինյանը ֆեյսբուքյան իր էջում գրառում էր կատարել այն մասին, որ այս կիրակի ընտանիքով Արցախ էին գնացել և մի քանի ժամ անցկացրել ճամփեզրյա մի ռեստորանում, որտեղ հաշիվը վճարելուց հետո ՀԴՄ կտրոն չէին տվել. «Աշխատողին ասացի՝ բայց Դուք հեռուստացույց չեք նայու՞մ, չեք տեսնու՞մ, որ ամբողջ օրը խոսում ենք ՀԴՄ կտրոնի, դրա կարեւորության մասին, ասում ենք, որ ՀԴՄ կտրոն չխփողը զինվորից է գողանում: Հիմա

Դուք կոնկրետ դրանով եք զբաղված ու ես հիմա դեպքի մասին ահազանգելու եմ Արցախի հարկային մարմիններին, որ ընթացք տան: Այդպես էլ վարվեցի ու կարծում եմ, որ բոլոր ՀԴՄ չխփողները պետք է պատժվեն օրենքի ողջ խստությամբ»,-գրել էր վարչապետը։

Աղբյուր` Փաստինֆո