Փաստ ինֆո

Իշխանություններն այս ընթացքում արել են առավելագույնը, որպեսզի Սահմանադրական դատարանի շուրջ ստեղծված ճգնաժամը չխորանա և դա արել են օրենքի, Սահմանադրության տառին հետևելով։ Այս մասին այսօր լրագրողների հետ ճեպազրույցում ասաց ԱԺ «Իմ քայլը» խմբակցության ղեկավար Լիլիթ Մակունցը։

Նա նշեց, որ այդ ամենն արտացոլված է նաև ԵԽԽՎ համազեկուցողների մեկնաբանություններում. «ՍԴ-ն ունի լեգիտիմության խորը դեֆիցիտ, ինչը վերականգնելու պահանջն այսօր ՀՀ քաղաքացիները մեր առաջ դնում են։ Մենք՝ որպես առաջնային մանդատ կրող ինստիտուտ, պարտավոր ենք սահմանադրական պարտավորությունների շրջանակում այս հարցը հանգուցալուծել»։

Մակունցի խոսքով,այդ կապակցությամբ «Իմ քայլը» խմբակցությունն անհրաժեշտ է համարում հրավիրել արտահերթ նիստ, որի օրակարգը կհաստատվի խորհրդի նիստի ընթացքում։

«Արտահերթ նիստի ամբողջ իմաստն այն է, որպեսզի այն խնդիրները, որոնք արձանագրեցի քիչ առաջ՝ հանգուցալուծում ստանան»,-ասաց խմբակցության ղեկավարը։

Նա հայտնեց, որ խմբակցությունն արտահերթ նիստի առաջարկը ներկայացրել է, հիմա սպասում են ԱԺ նախագահի որոշմանը։ Մակունցը չխոսեց առաջարկի բովանդակության մասին, սակայն հայտնեց՝ նպատակը ՍԴ-ի շուրջ ստեղծված ճգնաժամը շուտափույթ լուծելն է։

«Սահմանադրական դատարանի նախագահի պարտականությունները կատարող Հրայր Թովմասյանը հնչեցնում է քաղաքական տեքստեր՝ լինելով ՍԴ նախագահ, խոսում է խրամատներից, ինչն արդեն իսկ քաղաքական տեքստ է և ենթադրվում է, որ որպես թշնամիներ ներկայացվում են օրինակ «Իմ քայլի» անդամները»։

Վերջերս Հ1-ի ռեպորտաժում ականատես եղանք, որ պաշտոնական հարցմանն ի պատասխան ԱԱԾ-ն տեղեկություն էր տրամադրել, որ Ռոբերտ Քոչարյանի փաստաբան Արամ Օրբելյանը մի քանի անգամ այցելել է ՍԴ, սա ևս մեկ արձանագրում»,-ասաց Մակունցը։
Նրա խոսքով, Հրայր Թովմասյանը ներկայանում է որպես դատական իշխանության ղեկավար, սակայն դա այդպես չէ ու այդ հայտարարությունը նշանակում է, որ դատական իշխանությունը գրավելու նկրտումներ կան. «Ի հակառակ իշխանությունների ջանքերի՝ չթողնել, որպեսզի խորանա ՍԴ-ի շուրջ ճգնաժամը, տեղի է ունեցել հակառակը դատարանի կողմից»։

Մակունցն ասաց, որ միջազգային երկու կառույցների կարևորագույն հարցումները, որոնցից մեկի պատասխաններն արդեն հայտնի են, իսկ մյուսինը հանրային կդառնա շուտով, վկայում են այն մասին, որ ՀՀ բնակչության 90,5 %-ը երկու ուղղությամբ ակնկալում է կտրուկ ու հետևողական փոփոխություններ, որոնցից մեկը վերաբերում է կոռուպցիայի դեմ պայքարին, իսկ մյուսը՝ դատական համակարգում բարեփոխումներին։

Աղբյուր` Փաստինֆո