Փաստ ինֆո

Ոստիկանության բաժնում քաղաքացուց հակագազով և մահակով ցուցմունք կորզելու դեպքի առթիվ հարուցված քրեական գործի շրջանակներում դեռևս որևէ մեկին մեղադրանք չի առաջադրվել։ Այս մասին «Փաստինֆո»-ին հայտնեցին ՀՔԾ-ից։

Իրավապաշտպան Նինա Կարապետյանցը «Փաստինֆո»-ի հետ զրույցում ասաց, որ արդեն հոգեբանորեն պատրաստ են, որ գործի նախաքննությունն արագ չի ընթանալու։

«Իրավապահ մարմիններից ակնկալել, որ կլինի արագ առաջընթաց, արագ բացահայտում, մեղավորների պատժում, տրամաբանական և լուրջ չէ»,- նշեց Կարապետյանցը՝ հավելելով, որ այդ մասին զգուշացրել են նաև տուժողին և նրա ներկայացուցչին։

Նրա խոսքով՝ կան բազմաթիվ խոչընդոտներ, մասնավորապես՝ կապված օրենսդրության հետ։

Վերջինիս դիտարկմամբ՝ քրեական գործը հարուցվել է պաշտոնեական լիազորությունները չարաշահելու հատկանիշներով, ինչն ունի վաղեմության ժամկետ և դրանով պայմանավորված հնարավոր է, որ որևէ մեկը պատասխանատվության չենթարկվի։

«Մենք շարունակելու ենք պնդել, որ սա խոշտանգում է եղել և Կոնվենցիայի դրույթների համաձայն՝ եթե անգամ այդ պահին չի եղել գործող օրենքում համապատասխան հոդված, Կոնվենցիայի ուժով այդ հանցագործությունը չի կարող գնահատվել լիազորությունների չարաշահում, այլ՝ խոշտանգում»,- ասաց իրավապաշտպանը։

Նշենք, որ խոշտանգման դեպքում վաղեմության ժամկետը կիրառելի չի լինի։

Հիշեցնենք, որ 2019թ նոյեմբեր ամսին համացանցում տեսանյութ է տարածվել, որտեղ ոստիկանները հակագազերով և մահակներով բռնություն են գործադրում քաղաքացու վրա, ցուցմունք կորզում։ Դեպքի առթիվ քրեական գործ է հարուցվել ՀՀ ՔՕ 309-րդ հոդվածի երկրորդ մասի հատկանիշներով, այն է՝ պաշտոնեական լիազորություններն անցնելը, որը զուգորդվել է բռնություն գործադրելով, իսկ ծառայողական քննության շրջանակներում ոստիկանության պետի ժամանակավոր պաշտոնակատարի հրամանով ոստիկանության Ճամբարակի բաժնի պետ Նարեկ Սիմոնյանի լիազորությունները ժամանակավորապես դադարեցվել են։

Կարապետյանցի կարծիքով՝ բարդ գործընթաց է սպասվում, քանի որ իրավական խրթին հարցեր կան, սակայն աշխատանքներ են տարվելու այդ ուղղությամբ և պայքարելու են, որովհետև դա այն բազմաթիվ դեպքերից մեկն է, որը հնարավորություն կտա կանխել նման դեպքերի կրկնությունը։

Հարցին, թե արդյո՞ք շատ են նման դեպքերը, իրավապաշտպանն ասաց, որ վստահ է, որ շատ են։

«Երբ մենք շփվում ենք դատապարտյալների, կալանավորված անձանց հետ, իրենցից շատերը խոսում են այդ դեպքերի մասին, բայց, ցավոք սրտի, պատրաստ չեն բարձրաձայնելու, որովհետև իրենք շատ լավ գիտակցում են, որ որևէ պետական աջակցություն գտնել չեն կարող։ Իրենք հասկանում են, որ բարձրաձայնելուց հետո իրենք մնալու են այդ կրիմինալի և ադմինիստրացիայի ճնշումների ներքո, չաշխատող իրավապահ մարմինների անտարբերության ներքո և մնալու են անպաշտպան»,- ասաց իրավապաշտպանը՝ հավելելով, որ հենց դա է պատճառը, որ շատերը չեն ցանկանում խոսել։

Հեղինակ՝ Իզաբել Սահակյան

Աղբյուր` Փաստինֆո