Փաստ ինֆո

Պետական կառույցների գործունեության հետ կապված ունենք շատ լուրջ խնդիր, ունենք ակնհայտ հետընթաց։ Լրագրողների հետ հանդիպման ժամանակ այս մասին ասաց «Հանրային վերահսկողության կենտրոն» ՀԿ նախագահ Բաբկեն Հարությունյանը։

«Ոչ բարով նախկին պետական համակարգի ժամանակ էլ, երբ հարցումներ էինք ուղարկում, ստանում էինք դրանց պատասխանները սահմանված ժամկետում, միգուցե թերի, բովանդակությունը չբավարարող, բայց կար զսպվածությունը։ Այս իշխանությունը փոխարենն ավելի պատասխանատու մոտենա խնդրին, իշխանության են եկել և մոռացել, որ հաշվետու են ժողովրդին, քաղհասարակությանը, մենք էլ հետևողականորեն պահանջում և պայքարում ենք, որպեսզի տեր կանգնենք մեր իրավունքներին»,-ասաց Բաբկեն Հարությունյանը։

Նա նկատեց՝ պետբյուջեից ծախսվում են որոշակի գումարներ, իրենք էլ որպես հասարակական կազմակերպություն հարցման միջոցով փորձում են հասկանալ՝ այդ գումարներն ինչի վրա են ծախսվել, բայց չեն ստանում հարցումների պատասխանները. «Ի զարմանս մեզ չենք ստանում պատասխանները կամ ստանում ենք սահմանված հնգօրյա ժամկետից բավական ուշացումով։ Ավելին, ԱԺ-ն ռեկորդ խփեց, դեկտեմբերի սկզբին ուղարկած իմ հարցմանը պատասխանեց օրեր առաջ։ Սա բացարձակ ռեկորդ է, երբ հնգօրյա ժամկետում պարտավոր էին պատասխանել»,-հավելեց Բաբկեն Հարությունյանը՝ ընդգծելով, որ քաղհասարակությունը դա չի հանդուրժելու։

Բաբկեն Հարությունյանը հայտնեց, որ ՀՀ վարչապետին առընթեր «Հանրային կապերի և տեղեկատվության կենտրոն» ՊՈԱԿ-ին հարցում էին ուղարկել, որպեսզի տեղեկատվություն տրամադրեին ՊՈԱԿ-ի հաստիքացուցակի և դրա հետ կապված մի շարք այլ հարցերի վերաբերյալ, ինչի պատասխանը, սակայն, ՀԿ-ն չի ստացել․«Ստիպված էի ֆեյսբուքում գրառում անել և զգուշացնել գործադիր «ֆեյքապետին»՝ Հովհաննես Մովսիսյանին, որ չպատասխանելու դեպքում կլինի իրավական գործընթաց։ Դրանից հետո նրանք ուղարկեցին մեր հարցերի այսպես կոչված «պատասխանները»։ Յոթ հարցից երկուսին էին պատասխանել, որից մեկը լիարժեք, մյուսն էլ իրենց կայքի լինքն էին ուղարկել, որպեսզի այդկերպ ծանոթանանք հաստիքացուցակին»,-նշեց Բաբկեն Հարությունյանը՝ պնդելով, որ գործադիրը թաքցնում է՝ ովքեր են աշխատում այդ ՊՈԱԿ-ում։

Վերջինս ասաց՝ վստահ է, որ Հովհաննես Մովսիսյանը հաջորդ իշխանության ժամանակ պատասխանատվություն է կրելու. «Ֆեյսբուքում տարածվող ատելության քարոզը, հայհոյանքները, այս ամենը, ինչ տեղի է ունենում նրա մասնակցությամբ անհետևանք չի կարող մնալ։ Հովհաննեսն ընդամենը գործադիր ֆեյքապետն է, իսկ գլխավոր ֆեյքապետը երկրի ղեկավար Նիկոլ Փաշինյանն է, ում կողմից էլ թելադրվում են ատելության, հայհոյանքի գրոհը»,-հավելեց Բաբկեն Հարությունյանը։

Նշենք, որ Բաբկեն Հարությունյանը հայց է ներկայացրել «Հանրային կապերի և տեղեկատվության կենտրոն» ՊՈԱԿ-ի, ինչպես նաև Ազգային ժողովի դեմ։

Աղբյուր` Փաստինֆո