Փաստ ինֆո

Արցախում մահացած զինծառայող Վահրամ Ավագյանի համար նախօրեին իրականացված բողոքի ակցիայի ժամանակ ՝ փետրվարի 2-ին, սրտի կաթվածից մահացել է գյուղի 62-ամյա բնակիչ Մարտուն Աբելյանը։

«Փաստինֆո»-ի հետ զրույցում Հայթաղի գյուղապետ Մերուժան Մուրադյանն ասաց՝ տեղյակ չէ բնակիչը սրտի հետ կապված խնդիրներ ունեցել է, թե ոչ, սակայն կատարվածը ցնցել ու ցավ էր պատճառել գյուղում բոլորին. «Ցավալի էր շատ։ Միայն ընտանիքը չէր, դա մեր բոլորիս, բնակչության խնդիրն էր։ Բոլորի համար մեծ ցավ էր։ Մարդ է, երևի նեղվել է։ Մարտունը դագաղի ներքևից էր բռնել, չէր հասցրել շատ քայլել ու արդեն տեղի ունեցավ»,-նշեց գյուղապետը։
Նախքան շտապօգնության գալը՝ գյուղի տղաներն իրենց մեքենայով Մարտունին տեղափոխել են հիվանդանոց. «Բժիշկներն ասել են՝ մահացել է։ Ճանապարհին, թե արդեն հիվանդանոցում, տեղյակ չեմ»,-հավելեց գյուղապետը։

Ինչպես արդեն տեղեկացրել ենք, Արցախում մահացած Վահրամ Ավագյանի հարազատները երեկ հետաձգել էին հուղարկավորությունը և դագաղը ձեռքներին շարժվել դեպի Երևան։ Զինծառայողի հարազատները չեն հավատում ինքնասպանության վարկածին. Նրանք հավատացած են, որ տեղի է ունեցել սպանություն, ինչը փորձ է արվում քողարկել ինքնասպանությամբ։ Ոստիկանությունը փակել էր Արմավիր-Երեւան մայրուղին եւ ստեղծվել էր բավական լարված իրավիճակ, որը փոքր-ինչ հանդարտվեց ՀՀ պաշտպանության նախարար Դավիթ Տոնոյանի հետ հանդիպումից հետո։ Վերջինս հայտարարեց, որ իր ստացած տվյալների համաձայն՝ իր համար, տղան ինքնասպան չի եղել։

Հիշեցնենք, որ պարտադիր ժամկետային զինծառայող, շարքային Վահրամ Մկրտիչի Ավագյանի դին հայտնաբերվել է հունվարի 30-ին՝ ՊԲ բանակային ուսումնական կենտրոնում։ Ըստ քննչական կոմիտեի` նա իրեն ամրակցված ԱԿՄ տեսակի ինքնաձիգից կրակոցներ է արձակել իր կրծքավանդակի շրջանում և ստացած հրազենային վնասվածքներով տեղափոխվել զինվորական հոսպիտալ, որտեղ ժամը 14:00-ին արձանագրվել է վերջինիս կենսաբանական մահը:

Դեպքը որակվել էր որպես ինքնասպանություն ու քրեական գործ հարուցվել` ՀՀ ՔՕ 110-րդ հոդվածի 1-ին մասով՝ ինքնասպանության հասցնելու հատկանիշներով։

Բողոքի ակցիայի ժամանակ հայտնի դարձավ, որ Վահրամ Մկրտիչի Ավագյանի մահվան դեպքի առթիվ քննվող քրեական գործի շրջանակներում ձերբակալվել են Ավագյանի համածառայակիցներ Դավիթ Առաքելի Մովսիսյանը, Խաչիկ Արմենի Գասպարյանը, Սպարտակ Արթուրի Ավետիսյանը:Վերջիններս ձերբակալվել են ՀՀ քրեական օրենսգրքի 359-րդ հոդվածի 3-րդ մասով նախատեսված հանցավոր արարք կատարելու կասկածանքով, այն է զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում:

Հեղինակ՝ Հասմիկ Կոշկարյան

Աղբյուր` Փաստինֆո