Փաստ ինֆո

Վերաքննիչ քրեական դատարանը՝ դատավոր Անդրանիկ Մնացականյանի նախագահությամբ, մերժեց «Հանրապետական ծննդատան» տնօրեն Ռազմիկ Աբրահամյանին կալանավորելու պահանջի վերաբերյալ Դատախազության բողոքը։

Հիշեցնենք, որ 2019թ. դեկտեմբերի 22-ին Երեւանի ընդհանուր իրավասության դատարանը դատավոր Դավիթ Բալայանի նախագահությամբ մերժել էր Ռազմիկ Աբրահամյանին կալանավորելու քննիչի միջնորդությունը՝ արձանագրելով, որ բացակայում է հիմնավոր կասկածը: 2019թ դեկտեմբերի 30-ին Դատախազությունը բողոքարկել է Երևանի ընդհանուր իրավասության դատարանի նշված որոշումը՝ պահանջելով Աբրահամյանի նկատմամբ որպես խափանման միջոց ընտրել կալանավորումը։

Վերաքննիչ դատարանն այսպիսով ամրագրեց, որ կալանավորելու համար հիմքեր չկան։

Նշենք, որ Ռ.Աբրահամյանը մեղադրվում է օտարերկրացիների կողմից երեխաների որդեգրման գործով՝ ՀՀ քրեական օրենսգրքի 167-րդ հոդվածի 2-րդ մասի 2-րդ կետով եւ 200-րդ հոդվածի 3-րդ կետով:

«Փաստինֆո»-ն ավելի վաղ տեղեկացրել է, որ 2019 թվականի դեկտեմբերի 24-ին գրավոր հարցմամբ դիմել էր նախաքննական մարմնին՝ խնդրելով հայտնել, թե քրեական գործով քանի տուժող կա, ապօրինի որդեգրված քանի երեխա է հայտնաբերվել, եթե հայտնաբերվել են, ապա նրանք ում կողմից են որդեգրված՝ ՀՀ քաղաքացիների կողմից, թե օտարերկրացիների, հայտնաբերվել են արդյոք ապօրինի որդեգրված երեխաների կենսաբանական ծնողները, քանի ԴՆԹ փորձաքննություն է նշանակվել։

Քննչական կոմիտեն 26.12.2019թ. գրավոր պատասխանում հրաժարվել էր նշված հարցերի վերաբերյալ որեւէ տեղեկատվություն տրամադրել՝ նշելով, թե թույլատրելի համարված տեղեկատվությունն արդեն հրապարակված է քննչական կոմիտեի կայքում։ Սակայն հետագայում հայտարարեց, որ որեւէ ԴՆԹ փորձաքննություն չի նշանակվել, որեւէ արտաշիրիմում չի կատարվել, որեւէ «ապօրինի» որդեգրված երեխա չի վերադարձվել Հայաստան։

 Ծնողից «խլված» որեւէ երեխա չի հայտնաբերվել. չի նշանակվել որեւէ ԴՆՓ փորձաքննություն, չի կատարվել որեւէ արտաշիրիմում, մինչդեռ կա՝ հասարակական պարսավանք

Հեղինակ՝ Իզաբել  Սահակյան

Աղբյուր` Փաստինֆո