Փաստ ինֆո

Գրեցին օրենք, որով կա՛մ բիզնեսին ենք վնասելու, կա՛մ գործազրկությանն ենք խթանելու։ «Փաստինֆո»-ի «Դիրքորոշում» հաղորդման ժամանակ նման կարծիք է հայտնել Աուդիտորների պալատի նախագահ Նաիրի Սարգսյանը՝ անդրադառնալով ՀՕ այն փոփոխությանը, որով Երևանում 10 և ավելի աշխատակից ունեցող կազմակերպություններն աշխատավարձերը պետք է փոխանցեն անկանխիկ տարբերակով։

Նաիրի Սարգսյանը նկատեց՝ այս օրենքով փաստացի աշխատողի իրավունքների սահմանափակում տեղի կունենա։ Աշխատանքային պայմանագիրը գործատուի և աշխատակցի միջև ձևավորվող հարաբերություններ են, և նրանք են որոշում կանխիկ վարձատրել, թե անկանխիկ, հետևապես Նաիրի Սարգսյանի պնդմամբ՝ պետությունն այստեղ չպետք է միջամտեր. «Փոփոխության նպատակը շուկայում հայտնի սև աշխատավարձը սպիտակ դաշտ բերելն է, բայց այն իր նպատակին չի ծառայում։ Որպես գործատու ո՞վ է ինձ խանգարում պայմանական 200 հազ. աշխատավարձի դեպքում, 100 հազարը փոխանցել անկանխիկ, իսկ մյուս 100 հազարը՝ կանխիկ։ Ոչ մեկ իմ ձեռքը չի բռնում»,-նկատեց Նաիրի Սարգսյանը՝ ընդգծելով, որ ԱԺ պատգամավորները ժամանակ և ռեսուրս կորցրեցին՝ քվեարկելով այս նախագիծը, մինչդեռ երկրի առջև ծառացած են բազմաթիվ խնդիրներ։

Նաիրի Սարգսյանը վստահ է, որ այս օրինագիծը նպաստելու է գործազրկության աճին, քանի որ աշխատակիցների մեծ մասը ցածր վարձատրություն են ստանում, միևնույն ժամանակ պարտքերի տակ են, հետևաբար անկանխիկ վճարման դեպքում այդ պարտքերնը գնում են հարկադիր կատարման ծառայություն. «Երբ մարդիկ աշխատում էին կանխիկով, ստանում էին պայմանական 70-80 հազ. դրամ։ Դա այն գումարն է, որով հազիվ կարողանում են ապրել մինչև հաջորդ աշխատավարձ, դեռ մի բան էլ տանեն որպես հարկադիր պարտավորությունները վճարեն։ Նշանակում է՝ մարդն ամսվա կեսն ուղղակի պետք է սոված մնա։ Այսինքն բանկին ցուցում է գնում ու ասում՝ պահում կատարի»,-հավելեց Նաիրի Սարգսյանը։

Վերջինս ընդգծեց, որ այս պարագայում արդեն գործատուի և աշխատակցի միջև բանակցություններ են սկսվում, աշխատավարձի պայմանական որոշ մասը պահելու, իսկ մնացածը վճարելու համար, ինչն էլ գործատուից պահանջում է ժամանակ, ռեսուրս։ Ըստ Նաիրի Սարգսյանի՝ այս փոփոխությունն ազդում է գործատուի խղճի վրա. «Կան գործատուներ, որ կասեն՝ ունես հարկադիրում պարտավորություն դուրս արի իմ մոտից։ Եղա՞վ, որ գործազրկությանը նպաստեցինք։ Գործատու էլ կա, որ կխղճա, կպահի աշխատանքի, բայց չի գրանցի։ Այդ դեպքում էլ, երբ հարկային մարմինը մտնի, տուգանքների տակ կընկնի։ Այսինքն գրեցինք օրենք, որով կա՛մ բիզնեսին ենք վնասելու, կա՛մ գործազրկությանն ենք խթանելու»,-եզրակացրեց Նաիրի Սարգսյանը։

Հարցազրույցն ամբողջությամբ՝ «Փաստինֆո»-ի եթերում։

Աղբյուր` Փաստինֆո