Փաստ ինֆո

Վերաքննիչ քրեական դատարանում ՀՀ երկրորդ նախագահ Ռոբերտ Քոչարյանի փաստաբաններն այս պահին ինքնաբացարկի միջնորդություն են ներկայացնում դատավոր Արմեն Դանիելյանի: Հիշեցնենք, որ քննարկվում է «Մարտի 1»-ի մայր գործով բոլոր նյութերը ՀՀ երկրորդ նախագահ Ռոբերտ Քոչարյանի պաշտպաններին տրամադրելու ընդհանուր իրավասության դատարանի որոշման դեմ դատախազության բողոքը:

Պաշտպան Հովհաննես Խուդոյանը նշեց, որ դատական նիստին չի հրավիրվել իր պաշտպանյալը՝ Ռոբերտ Քոչարյանը, ինչը խախտում է նրա իրավունքները, սակայն ըստ պաշտպանի՝ կան ավելի լուրջ հիմքեր ինքնաբացարկ հայտնելու համար։ Մեղադրող Պետրոս Պետրոսյանը դեմ արտահայտվեց Հովհաննես Խուդոյանի ներկայացրած պնդմանը՝ նշելով, որ դա ձևականություն է, քանի որ պաշտպանները տեղեկացված են եղել նիստի օրվա և ժամի մասին։

Պաշտպանը ինքնաբացարկի միջնորդության հիմքում նշեց, որ միջնորդության պատճառը պայմանավորված է Դանիելյանի անձով՝ նշելով, որ վերջինս ունի անձնական վերաբերմունք, նախորդ բողոքի քննությունը եղել են հնարավոր կեղծիքներով։ Բացի այդ՝ պաշտպանը նշեց, որ նախորդ քննության ընթացքում բողոքների քննարկամանը պաշտպանական կողմին դատարանը թույլ չի տվել արտահայտվել և վճիռ է կայացրել միակողմանի դիրքորոշումների հիման վրա։

Ընդ որում՝ պաշտմանն ընդգծեց, որ հնարավորություն չի տրվել արտահայտվել նաև Ռոբերտ Քոչարյանին՝ իր իսկ խափանման միջոցի վերաբերյալ։

Պաշտպանի խոսքով՝ նախորդ բողոքի քննությամբ պայմանավորված բոլոր պաշտպանները կոշտ քննադատության են ենթարկել դատարանին, ինչի պատճառով դատարանը չի կարող կանխակալ բացասական վերաբերմունք չունենալ ։ Բացի այդ՝ Հովհաննես Խուդոյանը նշեց, որ նախորդ բողոքի քննության նյութերը դատարանը չի ուղարկել Առաջին ատյանի դատարան, ինչի պատճառով դատարանը չէր կարող քննարկել Ռոբերտ Քոչարյանիխափանման միջոցի վերաբերյալ միջնորդությունը։

Խուդոյանի խոսքով՝ հիմք է նաև այն, որ Վարչական դատարանում՝ Դանիելյանի նկատմամբ կարգապահական վարույթ հարուցելը մերժելու վերաբերյալ գործ կա, ինչը ևս բացառում է Դանիելյանի մասնակցությունը բողոքի քննությանը, քանի որ վերջինս հանդիսանում է շահագրգիռ կողմ։
Խուդոյանը նաև նշեց, որ Արմեն Դանիելյանի կայացրած ակտում նշվածը չի համապատասխանում Դանիելյանի ոճին՝ հիշեցնելով դատավոր Դավիթ Գրիգորյանի դեպքը, երբ հանցագործության մասին հաղորդում էր ներկայացվել այն մասին, որ վերջինիս կողմից կայացված դատական ակտը գրել են Վերաքննիչ քրեական դատարանի երեք այլ դատավորներ։ Խուդոյանը նաև որպես հիմք նշեց ԲԴԽ նախագահ Ռուբեն Վարդազարյանի «Փաստինֆո»-ին տված հարցազրույցը, որում նշված էր․ «Իշխանությունը ցանկանում է, որ մեր բոլոր դատավորները լինեն Արմեն Դանիելյանի և Աննա Դանիբեկյանի նման, իսկ ընդդիմադիրներն ուզում են, որ դատական իշխանությունը լինի Ալեքսանդր Ազարյանի և Դավիթ Գրիգորյանի նման»։

Պաշտպան Արամ Վարդևանյանը միացավ Խուդոյանի ներկայացրած ինքնաբացարկի միջնորդությանը։

Ավելի վաղ տեղեկացրել ենք, որ Ռոբերտ Քոչարյանի պաշտպան Հովհաննես Խուդոյանը նախաքննության ընթացքում միջնորդություն է ներկայացրել, որով պահանջել է ներկայացնել «Մարտի 1»-ի մայր գործով բոլոր նյութերը, այլ ոչ թե՝ առանձնացված մասի նյութերը, քննիչ մերժել: Փաստաբանը բողոք էր ներկայացրել դատարան եւ Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, բավարարել էր Հովհաննես Խուդոյանի բողոքը՝ պարտավորեցնելով ՀՔԾ-ին Ռոբերտ Քոչարյանի պաշտպաններին տրամադրել «Մարտի 1»-ի մայր գործով բոլոր նյութերը։

Դատախազությունը բողոքարկել է դատարանի նշված որոշումը, որը մակագրվել է Վերաքննիչ քրեական դատարանի դատավոր Արմեն Դանիելյանին:
Հիշեցնենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։

Հեղինակ՝ Իզաբել Սահակյան

Աղբյուր` Փաստինֆո