Փաստ ինֆո

ՀՅԴ ԳՄ անդամ Արծվիկ Մինասյանը ՀՀ վարչապետի գրիչի հիմնավորումն ու ԱԺ փոխնախագահ Ալեն Սիմոնյանի հայտարարություններն ամոթալի է համարում ու նշում, որ այդ մակարդակի զրույցները պատիվ չեն բերում երկրի կառավարման համակարգում ներգրավված անձանց։

«Այն, որ գործող քաղաքական իշխանությունը թե՛ գործադիր, թե՛ օրենսդիր մակարդակներում, նաև իրավապահ մարմինների միջոցով, ակնհայտորեն, անթաքույց հարձակում է գործել դատական իշխանության նկատմամբ, վաղուց է հայտնի։ Անցյալ տարի էլ, երբ բազմաթիվ օպերացիաներ նախաձեռնվեցին Վահե Գրիգորյանից սկսած քրեական գործերի հարուցմամբ ավարտված, որին միացավ, ցավոք սրտի, Հանրային հեռուստաընկերությունը, խոսում է այն բանի մասին, որ քաղաքական իշխանությունն ամեն գնով, գրիչ նվիրելուց սկսած, ավարտված գրկախառնությունների մեխանիզմներով, փորձ է անում ազատվել ՍԴ-ից»,-այս մասին այսօր հրավիրված ասուլիսում ասաց Մինասյանը։

Նա ընդգծեց՝ եկել է ժամանակը, որ հայ հասարակությունը, քաղաքական ուժերն ու այն շարժումները, ում համար շատ կարևոր են իրավական պետության նվազագույն սկզբունքների պահպանումը, դեմ արտահայտվեն իշխանության մոտեցումներին։

«Դեմ արտահայտվելը միայն հարցազրույցներով չէ, կոնկրետ քաղաքական ակցիաներ պետք է իրականացվեն, պետք է զսպվի քաղաքական իշխանության ախորժակը, քաղաքական իշխանության անբացատրելի ախորժակը, հակաօրինական ախորժակը»,-ասաց Մինասյանն ու ավելացրեց, որ իշխանության ներկայացուցիչներից շատերը չեն գիտակցում, որ իրենք ավելի մեծ հանրային պատասխանատվություն ունեն, քան ընդդիմության ներկայացուցիչները։

Աղբյուր` Փաստինֆո