Փաստ ինֆո

Ես արդեն սովորել եմ, երբ վարչապետը կամ քաղաքական իշխանության ներկայացուցիչներն անկեղծորեն ասում են մի բան, բայց իրականում իրենց գործողությունները տրամաբանորեն հակառակն են։ Այս մասին այսօր հրավիրված ասուլիսում ասաց ՀՅԴ Գերագույն մարմնի անդամ Արծվիկ Մինասյանը՝ անդրադառնալով Դարոն Աճեմօղլուի հայտարարությանը։

Նա նշեց, որ այդ հայտարարությունն այնքան պարզ էր, որ դրանից հետո գործադիր իշխանությունն ու դրա ղեկավարը պետք է գլուխները կախեին ու ասեին, որ պատրաստ են քննել բոլոր դեպքերը։

«Ոչ թե ասեին, որ համաձայն են ու երկրորդ պահին, երկրորդ նախադասությամբ շարունակեին հարձակումը դատական իշխանության վրա կամ հպարտորեն ասեն, որ պետական բյուջեի կատարման շրջանակներում բարձր ցուցանիշներ կան, այն դեպքում, որբ մեծամասնությամբ պետական ծախսումներն իրականացվել են ակնհայտորեն կոռուպցիոն հսկայական ռիսկեր պարունակող մեկ աղբյուրից գնումներ կատարելով»,-ասաց ՀՅԴ ներկայացուցիչը։

Նա՝ անդրադառնալով վարչապետի կապանյան ասուլիսին, ասաց, որ Փաշինյանն ասում է, թե ընդունում է ՀՅԴ-ին, հարգում է, համագործակցության հնարավորություն կա, սակայն մեծ հաշվով նշում է, որ հայաստանյան կազմակերպությունը պետք է լիկվիդացնել։

«Փոխարենը զսպելու իր կաբինետի անդամի անպատասխանատու հայտարարությունները...այդպիսի կոչ անող անձը երբ պատրաստ է համագործակցելու համազգային կազմակերպության հետ, բացելու երկխոսության դռները կամ առնվազն ընդունելու քննադատությունները, ինքը միանգամից պիտակավորում է։

Այդ վարչապետը չէ՞ր, որ ընդամենը մի քանի օր առաջ ասում էր 0 քաղաքական ազդեցություն, չուկ-չակ-չարակ-չակ էր մեջբերում, հիմա որի՞ն հավատամ, խոսքի՞ն, թե՞ գործին»,-ասաց Մինասյանը։

Նա ընդգծեց, որ քաղաքական մեծամասնությունը մեծ տարբերություն է դնում խոսքի ու գործի մեջ և եթե այդ պահին քաղաքական շահը սիրաշահելն է կամ քծնելը՝ կանի դա։

«Սա անառողջ քաղաքական համակարգի մասին է խոսքում, սա քաղաքական համակարգը ոչնչացնող քաղաքական մեծամասնության վարքագծի մասին է խոսում, իսկ եթե մենք ուզում ենք իբրև պետություն, հասարակություն ունենալ ժամանակակից, մրցունակ, կազմակերպված պետություն, այս բոլոր հարցերը իշխանությունը պետք է իր համար դարձնի քննարկման առարկա ու վերանայի իր մոտեցումները, հակառակ դեպքում հասարակությանն այս քաղաքական մշակույթով կտանի կործանման»,-շեշտեց Մինասյանը։

Հիշեցնենք, որ տնտեսագետ Աջեմօղլուն կասկածի տակ էր դրել ՀՀ կառավարության հակակոռուպցիոն ռազմավարությունը՝ կոչ անելով կոռուպցիայի դեմ պայքարը չվերածել քաղաքական մրցակիցներին հետապնդելու միջոցի:

Աղբյուր` Փաստինֆո