Փաստ ինֆո

ՌԴ դեսպանատան հայտարարությունը վերջին ամենակոշտ արձագանքն էր՝ Հայաստանի որդեգրած քաղաքականությանն ուղղված ։ «Փաստինֆո»-ի հետ զրույցում ասել է մեդիափորձագետ Տիգրան Քոչարյանը՝ անդրադառնալով ՀՌՀ նախագահ Տիգրան Հակոբյանի հայտարարությանը ՌԴ դեսպանատան արձագանքին։

Վերջինս, հիշեցնենք, հայտարարել էր, որ Հայաստանի հանրային թվային մուլտիպլեքսում օտար հեռարձակողներ չպետք է լինեն եւ որ Հայաստանում հեռարձակվող մի քանի արտասահմանյան հեռուստաալիքներ կան, որոնք կարող են հայ հեռուստադիտողների մոտ բացասական կարծիք ստեղծել մեկ այլ երկրի նկատմամբ, օրինակ, Իրանի, Վրաստանի , Ուկրաինայի։

Հայաստանում ՌԴ դեսպանատունը հայտարարության մեջ շեշտել էր, որ «ընդհանուր առմամբ, մեր ռազմավարական հարաբերությունների՝ դաշնակցային, եղբայրական բնույթի մասին ՀՀ ղեկավարության հայտարարությունների ֆոնին ռուսական հեռուստաալիքների՝ «ազգային անվտանգությանը սպառնացող վտանգների» մասին թեզը տարակուսանք է առաջացնում»։ Դեսպանատունը նաեւ հերքել էր, թե դեսպանը Տիգրան Հակոբյանի հետ հանդիպմանը նրա տեսակետի հետ կապված համաձայնություն է տվել։

Տիգրան Քոչարյանը հիշեց, որ ՀՌՀ նախագահ Տիգրան Հակոբյանն առաջին անգամը չէ, որ արտահայտում է հանրային մուլտիպլեքսից ռուսական հեռուստաալիքները հանելու գաղափարը։ Մեդիափորձագետը հիշեցրեց Լազարեւյան ակումբի 3-րդ նիստի ժամանակ Տիգրան Հակոբյանի ունեցած ելույթը.«Նա նման հայտարարություն էր արել եւ մեղադրել էր Ռուսաստանի առաջին ալիքին, որ վճարումներ չի անում, վարչապետի՝ արդեն նախկին խոսնակ Վլադիմիր Կարապետյանն էլ առաջարկել էր մասնակիցներին հայերեն խոսել, քանի որ պետական լեզուն հայերենն է՝ մոռանալով, որ Դիլիջանում Փաշինյանը անգլերեն էր խոսում»։

Այս, առաջին հայացքից փոքրիկ կսմիթները, մեդիափորձագետի համոզմամբ, ամենեւին էլ պատահական չեն, որովհետեւ հեղափոխական կառավարության կազմի ու Նիկոլ Փաշինյանի շրջապատի բացարձակ մեծամասնությունը ժամանակին այսպես, թե այնպես աչքի է ընկել հակառուսաստանյան քարոզչությամբ՝ Ռուսաստանի դեսպանատան դիմաց դրոշներ այրելուց մինչեւ տարբեր հակառուսական ցույցերին մասնակցություն։

«Այս ամբողջ զանգվածը հայտնվեց իշխանությունում ու պարզ է, որ մոխրոտիկի հեքիաթի նման իրենք միանգամից չփոխվեցին ու չդարձան ռուսաստանաֆիլ, որքան էլ Նիկոլ Փաշինյանը պնդի, թե ՌԴ-ի հետ հարաբերությունները փայլուն են»,-շեշտում է Տիգրան Քոչարյանը՝ հավելելով. «Իրականում այդպես չէ, ուղղակի ինչ-որ ժամանակ Փաշինյանն ու իր մերձավոր շրջապատը փորձում են շղարշ տալ, որ իրենք դարձել են Ռուսաստանի բարեկամը, որ հայ-ռուսական հարաբերություններն առաջընթաց են ապրում, բայց Փաշինյանի մոտակա շրջապատի անձինք բոլորը պրոարեւմտյան եւ շատ հաճախ հակառուսական հայացքներ ունեն։ Ժամանակին Սահակաշվիլին էլ, երբ նոր էր իշխանության եկել, առաջին կես տարվա ընթացքում հաճախ էր այցելում Ռուսաստան, շողոքորթում ու քծնում Պուտինին, բայց երբ դրսի հրամանը եկավ, նա 180 աստիճանով շրջվեց եւ ցույց տվեց իր իրական դեմքը»։

Մեդիափորձագետը հիշեցրեց փոխվարչապետ Տիգրան Ավինյանի՝ դեռ 2014 թվականի արած մի գրառում, որը Քոչարյանի խոսքով, որքան էլ զարմանալի է Ռուս-հայկական /Սլավոնական/ համալսարանի ուսանող լինելով գրել էր, որ ռուսական ալիքները սուտ են տարածում։

«Տիգրան Հակոբյանի հայտարարության հետ կապված էլ զավեշտալի է, որ նա նշում է, թե ռուսական ալիքների տրամադրած տեղեկատվությունը Հայաստանի բնակչության մոտ կարող է խեղաթյուրել Վրաստանի եւ Ուկրաինայի մասին տեղեկատվությունը։ Իմ կարծիքով, Տիգրան Հակոբյանը պետք է կողմնորոշվի, թե ով է Հայաստանի ռազմավարական դաշնակիցը՝ Ռուսաստա՞նը, թե՞ Վրաստանն ու Ուկրաինան, որոնք անընդհատ հակահայակական բանաձեւերին կողմ են քվեարկում միջազգային հարթակներում»,-ասաց մեդիափորձագետը։
Տիգրան Քոչարյանը ուշագրավ համարեց նաեւ ՏՄՊՊՀ-ի զեկույցում անուղղակի մեղադրանքը, «Ռոսնեֆտ»-ը Հայաստանում բարձր գներով դիզվառելիք է վաճառում, բացի այս, նրա խոսքով, վարչապետ Փաշինյանը Կապանում ապրիլյան պատերազմի մեջ Ռուսաստանի մեղքի բաժինը ընդգծեց, նրա մերձակա շրջանակն անընդհատ Հոկտեմբերի 27-ի հետ կապված ակնարկներ է անում։ Սրանք Տիգրան Քոչարյանի խոսքով, այսպես ասած փոքրիկ ազդանշաններ են։

Մեդիափորձագետը հիշեցրեց՝ Փաշինյանը մտածված, թե ոչ, արդեն մեկ անգամ հարված է հասցրել ՀԱՊԿ-ին, հիմա էլ ավտոմեքենաների վաճառքի խնդրի հետ կապված հայ-ղազախական հարաբերություններն են սրվում։
«Եթե մի երկրի հայտարարվում է ռազմավարական գործընկեր, պետք է ազնիվ լինել եւ զերծ մնալ կսմթոցներից եւ ներքին լսարանին ուղղված մեսիջներից, բայց կրկին շեշտեմ՝ այս ամենը սպասելի է, որովհետեւ չի կարելի կառավարությունից, որի քաղաքական թեւի գերակշիռ մասը հակառուսական տրամադրություններ ունի, պոզիտիվ կեցվածք ակնկալել»։

Ըստ Քոչարյանի, սա նաեւ Ռուսաստանում են հասկանում եւ այնտեղ լուրջ կասկածներ կան՝ նաեւ սորոսական թեւի առկայությանը հաշվի առնելով։

«Փաշինյանը պետք է հասկանա, թե արտաքին օրակարգում ինչ է ուզում եւ Ռուսաստանի հետ հարաբերություններում ինչ է ուզում։ Վերադառնալով Հակոբյանին, պետք է նշեմ, որ Ռուսաստանը շատ ցավոտ է արձագանքում այդպիսի բաներին եւ եթե շատ հարցերում այնտեղ աչք են փակում, չէի ցանկանա, որ այս հարցը խորանար այնքան, որ Ռուսաստանն սկսեր էլ ավելի ուշադիր լինել», «Փաստինֆո»-ի հետ զրույցում եզրափակեց Տիգրան Քոչարյանը։

Աղբյուր` Փաստինֆո