Փաստ ինֆո

Վիճակագրական կոմիտեն այսօր հրապարակեց անցած տարվա տնտեսական ակտիվության տարեկան ցուցանիշը։ Ըստ այդմ, 2019թ. Հայաստանում արձանագրվել է ակտիվության 7,8 տոկոս աճ։ Դեկտեմբերի արդյունքներով, տնտեսական ակտիվությունը շարունակել է վերելք ապրել։ 

Հիշեցնենք, որ տարեսկզբի 11 ամիսներին, այն կազմում էր 7,5 տոկոս։

Վիճակագրական կոմիտեի տվյալներով, անցած տարի անկում է գրանցվել միայն գյուղատնտեսության մեջ և էներգետիկայում։ Առաջինում արտադրության ծավալները նվազել են 4,2, երկրորդում՝ 1,9 տոկոսով։

Փոխարենը աճի բարձր՝ 15 տոկոս ցուցանիշ է գրանցվել ծառայությունների ոլորտում։ Ներքին առևտրի շրջանառությունն ավելացել է 8,9 տոկոսով։

Արդյունաբերության մեջ աճը հասել է 9 տոկոսի։

Թեև վարչապետի հայտարարած շինարարական բումը չկայացավ, այնուհանդերձ ծավալների ավելացում շինարարության մեջ արձանագրվել է։ Տարվա արդյունքներով, այն կազմել է 4,6 տոկոս։

Արտաքին առևտրի ոլորտում ևս շրջանառություններն ավեալացել են։ Բայց ներմուծման աճը գերազանցել է արտահանմանը։ Մի բան, ինչը վերստին հանգեցրել է արտաքին առևտրի բացասական հաշվեկշռի խորացման։ Արտաքին շուկաներ մատակարարումները Հայաստանից ավելացել են 9,4, ներկրումները՝ 10,8 տոկոսով։

Թե տնտեսական ակտիվության այս միտումներն ինչպիսի՞ ազդեցություն են ունեցել հասարակության եկամուտների վրա, կարելի է դատել միջին աշխատավարձի փոփոխություններով։ Անցած տարի միջին աշխատավարձը Հայաստանում ավելացել է ընդամենը 5,8 տոկոսով։

Դա առավել ակտիվ է արտահայտվել հատկապես պետական հատվածում, որը, ինչպես հայտնի է, ամբողջ տարվա ընթացքում նստած էր պարգևավճարների վրա։ Այնինչ, տնտեսության մեջ կամ մասնավոր հատվածում միջին աշխատավարձի աճը բավական համեստ է՝ հազիվ 3,8 տոկոս։

Աղբյուր` Փաստինֆո