Փաստ ինֆո

Կամակոր երեխայի անբացատրելի ցանկությունների դրսևորման օրինակ է, երբ քաղաքական մեծամասնությունն իրեն կամակոր, չարաճճի երեխայի պես է պահում։ Այս մասին այսօր հրավիրված ասուլիսում ասաց ՀՅԴ Գերագուն մարմնի ներկայացուցիչ Արծվիկ Մինասյանը։

«Ինչ ուզել է՝ ստացել է, հիմա իրեն թվում է թե պետք է ուզի ՍԴ խաղալիքը եւ պետք է տրվի, իսկ ով չտվեց՝ ուրեմն պատժել նրան»։ Ես այս կենցաղային մակարդակին իջեցրի, որպեսզի շատերի համար պարզ լինի, որ ՍԴ-ն իսկապես խաղալիք չէ և ոչ էլ քաղաքական մեծամասնությանը հլու–հնազանդ ենթակա»,-ասաց Մինասյանը։

Նա ընդգծեց՝ այն օրը, երբ ՍԴ-ն դարձավ քաղաքական մեծամասնության խոսքերն ու ցանկությունները կատարող, այդ պահից սկսած ոչ միայն չի լինելու ՍԴ, այլևս պետք կլինի մոռանալ սահմանադրության արդյունավետ կենսագործման մասին։

«ՍԴ-ն սահմանադրությամբ իր լիազորությունների շրջանակում զսպաշապիկ է ցանկացած իշխանության համար։ Որպես սահմանադրական արդարադատության բարձրագույն մարմին, ՍԴ-ն սահմանադրության անմիջական պատասխանատուն է, իսկ Սահմանադրությունը հստակ ամրագրում է թե՛ տարածքային ամբողջականության, թե՛ ցանկացած միջազգային փաստաթղթերի դեպքում, որոնք վերաբերում են տարածքներին, ֆինանսական պարտավորություններին, այնպիսի գործընթացներին, որոնք երկրի պետական, կառավարման համակարգում էական դերակատարություն են ունենում, ՍԴ-ն իր վերջնական խոսքն ասելու լիազորությամբ օժտված է»,-ասաց ՀՅԴ ԳՄ անդամն ու ավելացրեց, որ պարզ է՝ ցանկացած իշխանություն, որի ՍԴ-ն չի կիսում իր տեսակետներն ամբողջ ծավալով՝ ի դեմս այդ ՍԴ-ի տեսնելու է հակառակորդի։

Աղբյուր` Փաստինֆո