Փաստ ինֆո

Մինչ իշխանությունները և նրանց սպասարկող մեդիան փորձում են հանրությանը համոզել, որ ՍԴ նախագահ Հրայր Թովմասյանը հանցագործություն է գործել մեզ հաջողվեց հետաքրքիր մանրամասններ ճշտել այս գործով իշխանոթյան համար կարևորագույն վկայի՝ Ալվարդ Մելքոնյանի մասին, գրում է Politik.am-ը։

«Նախկին իշխանությունների հանցավորություններից դժգոհող նոր իշխանությունները պարզվում է կրկին քրեական գործ են հարուցել՝ հենվելով   խիստ կասկածելի անցյալ ունեցող մարդու ցուցմունքի վրա։

Պարզվում է Հրայր Թովմասյանի և վերջինիս սանիկ Նորայր Փանոսյանի գործողություններից «տուժած» անձը հասարակության շրջանում հայտնի է ««Ամենայն հայոց թալանչի» նոտար» մականվամբ։ Այս մասին ժամանակին հրապարակում է եղել «Լրագիր» պարբերականում, որը ներկայացնում ենք ամբողջությամբ․«Արդարադատության նախարար Հրայր Թովմասյանը կատարել է Երևանի Արամի փողոցի 72-80 շենքի բնակիչների պահանջը և պաշտոնից ազատել է Կենտրոն նոտարական տարածքի նոտար Ալվարդ Մելքոնյանին, ինչպես նաև նրա դեմ հայցադիմում է ներկայացրել Վարչական դատարան:

Ալվարդ Մելքոնյանի գործունեության մանրամասները Արամի 72-80 շենքի խաբված բնակիչները բացահայտել էին դեռևս նախորդ տարի, երբ նրանց մոտ հայտնված փաստաթղթերից պարզ էր դարձել, թե ինչ հնարամտությունների է դիմել նոտարը և  գործարքների գնացել պաշտոնյաների հետ: Նրա ձեռքով մեկ տան համար առուվաճառքի մի քանի նախնական պայմանագրեր են կնքվել այս շենքում, ինչի արդյուքնում էլ հնարավոր է եղել մեկ բնակարանը վաճառել մի քանի մարդու:

Շենքում բնակարանների գնման գործին խառնված են եղել նաև բարձրաստիճան պաշտոնյաներ, որոնք իրենց ու իրենց ազգականների անուններով մի շարք բնակարանների տեր են դարձել: 

Շենքի խաբված բնակիչները պնդում են, որ ոստիկանությունը չէր կարող տեղյակ չլինել սույն նոտարի գործունեության մասին, քանի որ նա օրը ցերեկով մեկ օրում մի քանի կնիք էր օգտագործում պայմանագրերը կնքելու համար:

Խաբված բնակիչները Ալվարդ Մելքոնյանին «ամենայն հայոց թալանչի» և «թալանի ամենամեծ մասնագետ» են անվանում: Ալվարդ Մելքոնյանը երիտասարդ տարիքում է համակարգում աշխատանքի անցել: Ըստ որոշ տեղեկությունների` դեռևս 20 տարի առաջ էլ նրա դեմ դատական գործեր են եղել:

Շենքի խաբված բնակչներն իրենց պայքարը շարունակում են: Չնայած Սերժ Սարգսյանը նրանց խոստացել էր, որ բնակարանների հարցը կլուծվի, սակայն սայլը տեղից չի շարժվում: Այսօր բնակիչները բողոքի ակցիա են արել ֆինանսների նախարարության մոտ, քանի որ այս հարցով ստեղծված միջգերատեսչական հանձնաժողովի նախագահը ֆինանսների նախարար Վաչե Գաբրիելյանն է: Նախարարը բնակիչներին խոստացել է, որ վաղը կառավարությունը որոշում կընդունի իրենց խնդրի վերաբերյալ: «Ասեց` ձեզ վաղը ժամը 1-ին պատասխան ենք տալու: Մենք էլ հարցրինք` տղամարդու խոսք ես տալի՞ս, ասեց` հա»,- տեղեկացրին բնակիչները:

Ըստ Սերժ Սարգսյանի հանձնարարականի` Լոգիկոն բիզնես-կենտրոնը պետք է իր կիսակառույց շենքերից մեկն ավարտին հասցնի ու մարդկանց այնտեղ տեղավորի: Բայց, մինչ այդ, կառավարությունը պետք է հարկերից ազատի ընկերությանը, որպեսզի հնարավոր լինի աշխատանքներն արագ ավարտին հասցնել:

Բնակիչները նաև դատական կարգով են փորձում վերականգնել իրենց խախտված իրավունքները: Նրանք միջնորդություն են ներկայացրել Կենտրոն և Նորք-Մարաշ վարչական շրջանների ընդհանուր իրավասության դատարան` կառուցապատողներից նախկին ոստիկան Սիմոն Աղազարյանի դեմ: Սակայն  արդեն մի քանի նիստ է` Աղազարյանը դատարան չի ներկայանում` առողջական խնդիրների պատճառով»,-ասվում է հոդվածում:

Այս ամենից ակնհայտ է դառնում, որ Ալվարդ Մելքոնյանը հին հաշիվներ ունի Հրայր Թովմասյանի հետ և նրա պնդումները առնվազն լուրջ չի համարել անառարկելի ճշմարտություն։ Ըստ էության իշխանությունները գտել են մի նոտարի, որը բնակիչների  պահանջով և այն ժամանակ արդարադատության նախարար Հրայր Թովմասյանի օրինական որոշմամբ զրկվել է նոտարի պաշտոնից։ Իշխանությունները նրան  առաջարկել են համագործակցել ու «վրեժ լուծել» նախկին նախարարից, որը հիմա էլ ՍԴ նախագահ է ու չի ենթարկվում գործադիր իշխանությանը։ Իսկ պլանի հաջող իրականացման դեպքում Ալվարդ Մելքոնյանը կարող է նաև պարգևատրվել՝ պետական պաշտոնի տեսքով»,-գրում է կայքը։

Աղբյուր` Փաստինֆո