Փաստ ինֆո

ՊԲ բանակային ուսումնական կենտրոնում երեկ՝ հունվարի 30-ին մահացած Վահրամ Ավագյանն արձակուրդից նոր էր վերադարձել զորամաս։ 

«Փաստինֆո»-ի հետ զրույցում Արմավիրի մարզի Հայթաղ գյուղի գյուղապետ Մերուժան Մուրադյանն ասաց, որ տղայի ընտանիքն իրենց համայնքի ամենախելոք, համեստ, աշխատասեր ընտանիքներից է. «Չորս եղբայր են, երեքը ծառայել էին, Վահրամ Ավագյանն էլ արդեն 6-7 ամիս էր, ինչ ծառայում էր։

Հունվարի 10-ին օտպուսկ էր եկել, նոր էր վերադարձել զորամաս»,-ասաց գյուղապետը՝ ընդգծելով, որ նրանք գյուղի ամենահանգիստ և համեստ երեխաներն են. «Որ գոռաս նրանց վրա, ձայն չեն հանի, այ տենց երեխաներ են։ Գյուղի համար շատ ցավալի է այս դեպքը, հատկապես, որ խեղճ ընտանիքից է։ Դաշտում են մեծացել, անասնապահությամբ, հողագործությամբ են զբաղվել, լավ չեն հագնվել, ճնշված, աղքատ ընտանիք է»,-նշեց Մերուժան Մուրադյանը։

Գյուղապետի խոսքով Վահրամ Ավագյանը ծառայության ընթացքից որևէ բողոք չի ունեցել։ Մերուժան Մուրադյանը պատմում է՝ հայրը ցանկացել է գումար ուղարկել, բայց Վահրամ Ավագյանն ասել է, որ ամեն ինչ լավ է. «Ասել է էստեղ լավ կերակրում են, խորոված են տալիս, քյուֆթա են տալիս։ Ոչ մի տրտունջ, պրոբլեմ չի եղել»։

Անդրադառնալով միջադեպին՝ Մերուժան Մուրադյանը մանրամասներ չհայտնեց,սակայն ասաց՝ չի հավատում՝ տղան ինքնասպան եղած լինի. «Դժվար՝ ինքնասպան, չեմ հավատում։ Նա էն երեխան չէր, որովհետև տենց օր չէր ապրել, որ նեղությունից նեղվեր ինքը։ Հնարավոր չէ»։
Հայթաղի գյուղապետը նաև ասաց, որ ընթանում է դատաբժշկական փորձաքննությունը և սպասում են արդյունքներին։

Հիշեցնենք, որ երեկ՝ հունվարի 30-ին, ՊԲ բանակային ուսումնական կենտրոնում N զորամասի պարտադիր ժամկետային զինծառայող, շարքային Վահրամ Մկրտիչի Ավագյանն իրեն ամրակցված ԱԿՄ տեսակի ինքնաձիգից կրակոցներ է արձակել իր կրծքավանդակի շրջանում և ստացած հրազենային վնասվածքներով տեղափոխվել զինվորական հոսպիտալ, որտեղ ժամը 14:00-ին արձանագրվել է վերջինիս կենսաբանական մահը:Դեպքի առթիվ հարուցվել է քրեական գործ՝ ՀՀ ՔՕ 110-րդ հոդվածի 1-ին մասով՝ ինքնասպանության հասցնելու հատկանիշներով։ Կատարվում է նախաքննություն։

Հեղինակ՝ Հասմիկ Կոշկարյան

Աղբյուր` Փաստինֆո