Փաստ ինֆո

Արդարադատության նախարարության կողմից Սահմանադրական բարեփոխումների հանձնաժողովի անդամներին ընտրելու գլխավոր չափորոշիչն իշխանությունների նկատմամբ եթե ոչ դրական ապա գոնե լոյալ վերաբերմունքն է եղել, իսկ չափորոշիչների հարցում մասնագիտական որակների հետ կապված անգամ քննարկելու բան չկա։ «Փաստինֆո»-ի հետ զրույցում ասաց արդարադատության նախկին նախարար, ԱԺ նախկին փոխնախագահ Արփինե Հովհաննիսյանը։

«Թեև արդարադատության նախարարն ասում է, որ իրենք փորձել են «չեզոք» մարդկանց ընտրել, բայց ես իմ գրառմամբ այսօր ակնարկել եմ, որ կան բազմաթիվ հանձնաժողովականներ, այդ թվում իրավաբանական-գիտնականների շարքում կան մարդիկ, ովքեր տարբեր առիթներով իշխանության տարբեր ներկայացուցիչներին իրենց պաշտպանությունն ու համակրանքն են հայտնել»,-ասաց Հովհաննիսյանը։ 

Անդրադառնալով իր՝ հանձնաժողովի անդամ չընտրվելու պատճառներին, Հովհաննիսյանն ասաց, որ ամենահստակն այդ մասին ասել է Արդարադատության նախարար Ռուստամ Բադասյանը․ «Ես չեմ ընդգրկվել, քանզի իմ քաղաքական հայացքները չեն համապատասխանում իշխանության ցանկություններին ու քիմքին։ Դա եղել է քաղաքական որոշում»։

Արդարադատության նախկին նախարարն ասաց՝ դեռ չգիտի, թե այս հանձնաժողովն ինչ է ուզում փոխել Սահմանադրության մեջ, այդ իսկ պատճառով չի կարող նրանց ուշադրությունն այս կամ այն կետի վրա հրավիրել։

Հիշեցնենք, որ երեկ հրապարակվեց Արդարադատության նախարարության կողմից Սահմանադրական բարեփոխումների հանձնաժողովի կազմը։ Հանձնաժողովի կազմում ընդգրկվելու համար Արփինե Հովհաննիսյանը նույնպես հայտ էր ներկայացրել, սակայն նրա թեկնածությունը չի ընտրվել։ Այս կապակցությամբ այսօր լրագրողների հետ ճեպազրույցում արդարադատության նախարար Ռուստամ Բադասյանն ասել էր․ «Իրականում չենք ուզում այս քայլով ցույց տալ, որ մենք իր օգնության կարիքը չունենք կամ ունենք, ուղղակի Արփինե Հովհաննիսյանի դիմումում նշված է, որ ինքը մասնակցել է նախորդ Սահմանադրության փոփոխությունների հանձնաժողովի աշխատանքներին։ Իրականում, կարծես թե, խոսք է գնում ոչ ֆորմալ մասնակցության մասին, որովհետև մենք նայել ենք այնտեղ ֆորմալ առումով տիկին Հովհաննիսյանը որպես հանձնաժողովի անդամ չի եղել, բայց մենք կասկածի տակ նույնիսկ դա չենք դնում»։

Հեղինակ՝ Սոնա Գևորգյան

Աղբյուր` Փաստինֆո