Փաստ ինֆո

Հայ-վրացական սահմանի՝ Բագրատաշենի ու Բավրայի մաքսակետերում «Դյութի ֆրի» կետեր բացելու որոշման նախագիծը վարչապետի առաջարկով հանվեց կառավարության նիստի օրակարգից։

Նախագիծը զեկուցող ՀՀ ՊԵԿ նախագահ Դավիթ Անանյանն ասաց, որ թե՛ Բագրատաշենի, թե՛ Բավրայի մաքսային կետերն ու դրանց հարակից սպասարկման գոտիները հանդիսանում են մաքսային հսկողության գոտի, հետևաբար որոշակի պահանջներ են դնում այն տնտեսվարողների առջև, որոնք ցանկանում են տվյալ տարածքներում անմաքս առևտրի կետեր հիմնել։

ՊԵԿ նախագահի խոսքով ցանկություն հայտնել է «Դյութի ֆրի» ռուսաստանյան ընկերության դուստր ձեռնարկությունը՝ «Դյութի ֆրի մարկետ Արմենիա»-ն։

ՀՀ վարչապետ Նիկոլ Փաշինյանի խոսքով անընդունելի է նման որոշումը միայն մեկ ընկերության առաջարկով ընդունելը. «Ինչու՞ այդ ամեն ինչը չենք դնում մրցութային տրամաբանության մեջ, որպեսզի ունենանք ամենալավ նախագիծը, Հայաստանն էլ ունենա ամենամեծ օգուտը։ Համայնքի ղեկավարին ասում ենք՝ վարձակալությամբ տուր, հետո գնում, տեսնում ենք՝ նվազագույն գնով է վարձակալության տվել հողը»,-ասաց վարչապետը, ում առաջարկով որոշումը հանվեց կառավարության օրակարգից, որպեսզի քննարկեն նաև այլ տնտեսվարողների առաջարկները՝ լավագույնն ընտրելու նպատակով։

Աղբյուր` Փաստինֆո