Փաստ ինֆո

«Մարդկային զարգացման միջազգային կենտրոն»-ի նախագահ Թեւան Պողոսյանը կարծում է, որ Ժնեւում ընթացող ՀՀ եւ Ադրբեջանի ԱԳ նախարարների հանդիպման օրակարգում ոչ բուն հակամարտության լուծման խնդիրն է, այլ այն խնդիրները, որոնք եղել են նախկինում եւ վերաբերում են բանակցային ձեւաչափին , բանակցային գործընթացի մթնոլորտին եւ հումանիտար շփումներին։

«Ենթադրում եմ, մասնավորապես ձեւաչափի հետ այն խնդիրն է դրված, որ Արցախը պետք է վերադառնա բանակցային սեղան ՝ հատկապես ընտրություններից հետո , երեւի հայկական կողմը կբարձրաձայնի այն խնդիրը, որ բանակցություններ կարող են լինել միայն վստահության մթնոլորտում եւ այն, թե ինչ պետք է անել դրա համար, առաջնագծում անվտանգության խնդիրների մասին, որը կանվանեի Վիեննա-Պետերբուրգ պայմանավորվածությունների բովանդակային մասին ուղղված տարբեր քննարկումներ, թե ինչ ծրագրեր կարող են հաջորդել լրագրողների փոխայցելություններին»,-«Փաստինֆո»-ի հետ զրույցում կարծիք հայտնեց Թեւան Պողոսյանը՝ հավելելով, որ դժվար է պատկերացնել, որ կողմերը բուն հակամարտությանը վերաբերող հարցեր կքննարկեն այն պարագայում, երբ ընտրություններ են սպասվում թե Ադրբեջանում, թե Արցախում։

Հիշեցնենք, Զոհրաբ Մնացականյանի եւ Էլմար Մամեդյարովը նախօրեին 7 ժամ հանդիպում են ունեցել, որն այսօր շարունակվել է համանախագահների մասնակցությամբ։

Թեւան Պողոսյանը արտգործնախարարների երկարատեւ հանդիպման փաստը տարօրինակ չի համարում։ Նրա խոսքով, կան նաեւ խնդիրներ, որոնք օրինակ, բարձրացնում էր Ադրբեջանի ԱԳ նախարարը, առաջ քաշելով հարցադրումը, թե ինչ է «անվտանգություն»-ը կամ «ստատուս քվո»-ն։ «Հայկական կողմը երեւի դրա բացատրություններն ունի, իրենք՝ իրենցը եւ պետք է հասկանան, քննարկեն։ Այս իմաստով շատ երկար խոսելու մեջ որեւէ պրոբլեմ չեմ տեսնում»,-կարծում է Թեւան Պողոսյանը։

Ինչ վերաբերում է Արցախյան հիմնախնդրի կարգավորման հարցում Հայաստանի իշխանությունների դիրքորոշմանը, Թեւան Պողոսյանը հիշեցրեց վարչապետ Փաշինյանի խոստումը. « Տրվել են խոստումներ, այդ խոստումներից մեկը Արցախը բանակցային սեղան վերադարձնելն է, թող գնա, բանակցի, դրա համար ենք չէ՞ մենք քվե տվել , ասել են՝ որեւէ հարց չի լուծվելու առանց ձեր ցանկության»։

Դիտարկմանը, թե այդ հայտարարությանը հաջորդել էր վարչապետի՝ «Արցախը Հայաստանն է եւ վերջ» հայտարարությունը, Թեւան Պողոսյանն արձագանքեց. «Դե , թող գնան եւ համոզեն Ադրբեջանին եւ աշխարհին, որ իսկապես սա է իրականությունը եւ սրանով պետք է ապրել , եթե ոչ, մենք բոլորս ունենք այդ խնդիրը՝ ապացուցելու աշխարհին»։

Թեւան Պողոսյանն ընթացող բանակցությունները զուտ «կետային հանդիպում» է համարում՝ շեշտելով, որ Արցախյան հիմնահարց ասելով պետք է նկատի ունենանք 1918 թվականից ի վեր բոլոր գործընթացները։ «101 տարի է՝ գնում է, մենք պետք է հասկանանք, միգուցե եւս 101 կամ 201 տարի է պետք, պետք է մեր խնդիրները տանենք առաջ»։

«Փաստինֆո»-ի հարցին, արդյո՞ք Հայաստանի այսօրվա ներքին պառակտվածության մթնոլորտում հնարավոր է լինելու առաջ տանել այդ խնդիրը, Թեւան Պողոսյանն ասաց. «Դա բոլորովին այլ խնդիր է, երբ մենք սկսենք գիտակցել, որ կներեք, պետք չէ անպայման ֆորսմաժորային իրավիճակ լինի առաջնագծում, որ բոլորս միասնական լինենք, այդ խնդիրը կլուծվի։ Դա ինչի՞ հետեւանք է լինելու՝ Ադրբեջանի հաշվարկների, որ հայերի մեջ կա պառակտում, թուլություն եւ գուցե, փորձենք այսօր։ Ադրբեջանը իր քաղաքական որոշումը՝ խնդիրը ռազմական ճանապարհով լուծելու, կայացրել է, եւ լինի Ալիեւը, թե մեկ ուրիշը, դրանով է առաջնորդվելու ։ Մենք պետք է կարողանանք մեր խնդիրը լուծել եւ պետք է գիտակցենք, որ Ադրբեջանը չի կարող գնալ սրացումների՝ ամեն օր զգալով, որ հայկական կողմն իրենից ուժեղ է»։

Թեւան Պողոսյանն ասաց՝ ոազմական բալանսի տեսանկյունից խնդիրը լուծված է, բայց մենք պետք է գիտակցենք, որ Ադրբեջանը սկսել է բանակցություններ նոր զինատեսակներ գնելու։ «Այս ժամանակահատվածը մենք պետք է կարողանանք օգտագործել՝ թույլ չտալու համար , որ նորից բալանս խախտվի , դրա համար մենք պետք է մեր տնային աշխատանքը անենք, որի մեջ մտնում է մեր տնտեսության, ռազմարդյունաբերության , գիտության զարգացումը, ժողովրդագրության բարելավումը։ Բոլոր այս խնդիրների համար շատ կարեւոր կոմպոնենտ է մեր միասնությունը»։

Աղբյուր` Փաստինֆո