Փաստ ինֆո

ԱԺ փոխնախագահ Ալեն Սիմոնյանն ենթադրում է, որ առաջիկա 1-2 ամիսների ընթացքում Սահմանադրական դատարանի թեման մեկընդմիշտ կփակվի։ «Ես դա պայմանավորում եմ այն գործընթացներով, որ, ըստ իս արդեն ավարտին է հասցվում։Խոսքն իրավական գործընթացների մասին է, որտեղ լուծումներ են լինելու և ՍԴ-ն, ևս մեկ վայր, որ մնացել է հին Հայաստանում, ազատվելու է և հայտնվելու է նոր Հայաստանում։ Ուզի, թե չուզի Հրայր Թովմասյանը»,-ասաց Սիմոնյանը։

Հարցին, եթե խնդիրը լուծվի սահմանադրական բարեփոխումների կարիք կլինի՞՝ ԱԺ փոխնախագահը պատասխանեց․ «Իսկ ինչու՞ եք բացառում, որ բարեփոխումներով կլինի այդ հարցի լուծումը։ Ո՞վ է ասում,ո ր 2 ամսվա ընթացքում հնարավոր չէ բարեփոխումներն անել։ Ես կարծում եմ, որ շատ ավելի շուտ հնարավոր է շատ արագ լուծել և ես վստահեցնում եմ, որ իրավական առումով այդ մեխանիզմները կան ու կիրառվելու են»։ Մեկ այլ հարցին, այդ հանգուցալուծումը պատկերացնում եք միայն Հրայր Թովմասյանի պաշտոնանկությա՞մբ, թե՞ նաև մյուս դատավորները պետք է լքեն ՍԴ-ն՝ Սիմոնյանը պատասխանեց․ «Ես ՀՀ-ում պատկերացնում եմ ՀՀ քաղաքացիների վստահությունը վայելող ՍԴ և դատական համակարգ։ Այսօր ունենք ՀՀ քաղաքացիների վստահությունը վայելող կառավարություն, ԱԺ, և դատական համակարգը իշխանությունների բաժանման ճյուղերի մասով այն վերջին «ֆորպոստն է» , որն այսօր քաղաքականացված ու նախկին իշխանություններին սպասարկող Հրայր Թովմասյանը փորձում է պահել»։ Անդրադառնալով ՍԴ դատավոր Վահե Գրիգորյանի աշխատանքի չգնալուն, սակայն աշխատավարձ ստանալուն ու ծառայողական մեքենայից օգտվելուն՝ Սիմոնյանն ասաց, որ այդ հարցը պետք է ուղղել հենց Գրիգորյանին։ «Մեր ընտրած թեկնածուն է, բավականին բարձր ձայներով, գրեթե 100 ձայնով ընտրվել է, և ես չեմ պատրաստվում հիմա գնահատականներ տալ, որովհետև ՍԴ-ում հիմա ճգնաժամ է և ճգնաժամի մեջ գտնվող ՍԴ-ի հայտարարությունը չեմ պատրաստվում մեկնաբանել»,-ասաց Սիմոնյանը։ Նա նշեց, որ եթե ՍԴ-ն իրավասություն ունի Վահե Գրիգորյանի պաշտոնանկության վերաբերյալ նախաձեռնություն ուղարկել ԱԺ, ապա Գրիգորյանը, միանշանակ, պատասխանատվության կենթարկվի․ «Ինչի Ձեզ թվում է, որ, եթե Վահե Գրիգորյանին ընտրել ենք, ապա օրենք խախտի պիտի ասենք հա տե՞նց է, իհարկե ոչ։ Եթե պարզվի, որ օրենք է խախտել, ի՞նչ տարբերություն Վահե Գրիգորյանն է, ես եմ, թե՞ Հրայր Թովմասյանն է։ Դա չի քննարկվում»։

Աղբյուր` Փաստինֆո