Փաստ ինֆո

Ես մեր ոստիկանությանը խնդրում ու հորդորում եմ, որ պահպանեն իրավունքի տարրը, եթե ունեն ակնհայտ հիմքեր անձանց բերման ենթարկելու համար՝ ապօրինի զենք-զինամթերք լինելու վերաբերյալ, ապա թող գեղեցիկ միջոցառումների շրջանակներում անձանց բերեն ոստիկանության բաժանմունք, բայց եթե չկան, ապա այնքան հիմքեր կան այլ անձանց կողմից հանցագործությունների կատարման, թող զբաղվեն նրանցով։ Այս մասին այսօր տեղի ունեցած խորհրդարանական ճեպազրույցների ժամանակ ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը։

Նա ընդգծեց, ո ր գործողությունները պետք է համաչափ լինեն, եթե համաչափ չեն՝ բոլորի մոտ համապատասխան մտահոգություն է առաջանում։

«Վանաձորում երկար ժամանակ կային խմբեր, ովքեր և՛ զինված էին, և իրավախախտումներ էին կատարում, մի քանի ամիս առաջ այդ խմբերից մեկը ֆիզիկապես ոչնչացավ մեկ այլ անձի հրաձգության պատճառով, և երբ ոստիկաններին ասում էինք, որ բոլորդ գիտեք այդ անձինք զինված են, հանցագործություններ են կատարում, ինչու՞ այդ մարդկանց չեք ձերբակալում, ոստիկաններն ասում էին. «Դե մենք ձերբակալում ենք, դատարանն ազատում է, որովհետև հիմքեր չենք կարողանում ներկայացնել ու վախենում ենք այդ անձանց ձերբակալել», և այդպես այդ մարդիկ քաղաքում ման էին գալիս, բոլորը գիտեին, որ նա զինված է։ Զուգահեռաբար ունենք երեկվա դեպքերը, երբ կասկածանքի որևէ ակնհայտ հիմք չկար և այդպիսի շոուի շրջանակներում այդ անձինք բերման են ենթարկվում»,-ասաց ԼՀԿ պատգամավորը։

Սիմոնյանն ասաց, որ տպավորություն է առաջացել, թե իրականում ոստիկանությունը չուներ համապատասխան հիմքեր, բայց նման գործողություններ կատարեց՝ ցանկություն ունենալով այդ անձանց քավության նոխազ կամ քաղաքական գործիչ դարձնել, ակտիվացնելով նրանց քաղաքական կոմպոնենտը։

Աղբյուր` Փաստինֆո