Փաստ ինֆո

«Որեւէ մեկը, այդ թվում նաեւ ոստիկանության պաշտոնակատարը թող չմտածի, որ կարող է արդարանալ նրանով, որ իրեն հրահանգել կամ խրախուսել են։ Ամեն մեկը, մանավանդ բարձրաստիճան պաշտոնատար անձը կրում է անձնական պատասխանատվություն եւ դա նյուրնբերգյան գործընթացներից մնացած սկզբունք է»,-«Փաստինֆո»-ի հետ զրույցում ասաց «Ընդդեմ իրավական կամայականությունների» ՀԿ նախագահ, ՀՀ առաջին մարդու իրավունքների պաշտպան Լարիսա Ալավերդյանը՝ անդրադառնալով ոստիկանության՝ նախօրեին իրականացրած գործողություններին։

Լարիսա Ալավերդյանն ասաց, որ առհասարակ, ոստիկանության նկատմամբ դրական վերաբերմունք ունի եւ անկախ բոլոր թերություններից, կարծում է, որ ոստիկանությունն է հասարակության ներսում կայունության պահապանը, բայց, ինչպես նկատեց բանախոսը, այսօր, ցավոք , ստացվում է, որ ոստիկանությունը դարձել է հումորի ու կատակի առարկա։

«Դա ամենաառողջ արձագանքն է, որովհետեւ, այն, ինչ տեղի է ունենում, ամբողջովին հակաիրավական է, հակաօրինական է եւ բոլորովին չի բխում ոչ իրավիճակից, ոչ էլ համապատասխանում է այն անձանց կերպարին, որոնց վերագրվում է այդ ամենը»,-ասաց Լարիսա Ալավերդյանը։

Հիշեցնենք, որ երեկ դիմակավորված անձինք գետնին պառկեցնելով, ցուցադրաբար ոստիկանության 6-րդ վարչություն են բերման ենթարկվել «Վետոօ» նախաձեռնության հիմնադիր Նարեկ Մալյանին, «Ադեկվադ» միաբանության նախագահ Արթուր Դանիելյանին, միաբանության անդամներ Կոնստանտին Տեր-Նակալյանին, Գրիգոր Մինասյանին և Ազատ Ադամյանին։ Նշվել է ապօրինի զենք եւ թմրանյութեր պահելու, օգտագործելու կասկածների մասին։ Երիտտասարդները ժամեր անց ազատ են արձակվել, իսկ ուշ երեկոյան նույն սցենարով բերման է ենթարկվել, ապա ազատ արձակվել «Անտիֆեյք» կայքի հիմնադիր Նարեկ Սամսոնյանը։

Իրավապաշտպանը շեշտեց՝ այս դեպքում խոսքը անգամ իրավունքի մասին չէ, այլ օրենքի, որը ոստիկանությունը պարտավոր է պահպանել. «Հիմա, փաստորեն, ոստիկանության ղեկավարի ՝ հլու-հնազանդ լինելու պատճառով մի ամբողջ հաստատություն դառնում է ծաղրուծանակի առարկա, որովհետեւ նայելով այդ երիտասարդների, ի վերջո մտավորականի դեմքին, որեւէ մեկի մտքով չի անցնում, որ կարող է նրանք արել են այն, ինչ մեջ իրենց կասկածում են եւ այն, որ բերման ենթարկելուց ժամեր անց նրանք ազատ են արծակվում, ես չգիտեմ դա ինչ է, ի վերջո, սա երկի՞ր է, թե ոչ»։

Լարիսա Ալավերդյանը համոզված է՝ այն, ինչ տեղի ունեցավ իշխանության վերին օղակների քմահաճույքներին չդիմադրել է կամ այդ քմահաճույքները ողջունել՝ ցուց տալու համար, որ ամեն ինչ արվում է այնպես, ինչպես իրենց քիմքին է հաճելի։ «Ես դա վտանգավոր եմ համարում։ Կներեք, ինձ չի հետաքրքրում ոչ քաղաքական գործիչը, ոչ էլ՝ քաղաքական ուժը, դա վտանգավոր է հասարակության, երկրի եւ պետության համար։ Այդ քայլականների մեջ կա՞ որեւէ մեկը, որը վեր կկենա ու կասի, որ մենք պետք է մի տեղ կանգնենք եւ սթափվենք»,-ահազանգեց Լարիսա Ալավերդյանը՝ շարունակելով.«Իհարկե, ամբողջովին պատասխանատվությունը վարչապետի վրա է, բայց ասենք թե նա սխալվել է, դա աշխարհի վե՞րջն է, թե ՞ նա պետք է ունենա իր շրջապատում մի քանի մտածող մարդ, մի քանի պետականամետ անձ, որոնք կկարողանան ամենադրական ու մեղմ մոտեցումները սթափեցնել ու կանգնեցնել այս իրավիճակը , որի մեջ մենք ընկել ենք։ Մենք այն շրջապատում չենք, որ թույլ տանք ցածր ոճի քմահաճույքներով առաջնորդվել եւ այոք, առաջին հերթին դա վերաբերում է ոստիկանապետի պաշտոնակատարին»։

Աղբյուր` Փաստինֆո