Փաստ ինֆո

Արտաքին գործերի նախարարությունը կապը պահպանում է Չինաստանում ապրող ՀՀ քաղաքացիների հետ։ Մամուլի ասուլիսի ժամանակ այս մասին ասաց ԱՆ Վարակիչ հիվանդությունների համաճարակաբանության բաժնի պետ Լիանա Թորոսյանը։

«Թիվը փոփոխական է, բայց մենք գիտենք Ուհան քաղաքում ապրող երեք ուսանողի և երկու-երեք պայմանագրային հիմունքներով աշխատակիցների մասին։ Բոլորի հետ կապը պահպանված է։ Դեռևս որևէ խնդիրներ չունենք, նրանք տանից դուրս չեն գալիս, և նաև սննդակարգին են հետևում։ Այս պահի դրությամբ որևէ խնդիր չկա»,-ասաց Լիանա Թորոսյանը։

Վերջինս անդրադարձավ նաև վիրուսի փոխանցմանը։ Նա նշեց, որ գրանցվել են հիվանդ մարդուց առողջ մարդու փոխանցման դեպքեր. «Այլ երկրներում արձանագրված դեպքերը բերովի են։ Այսինքն բերովի դեպքից նոր դեպքեր չկան։ Բայց սա իհարկե վերջնական արդյունք չէ»,-ասաց Լիանա Թորոսյանը։

Վիրուսի փոխանցման դեպքեր Չինաստանում կան նաև բուժաշխատողների շրջանում։ Անդրադառնալով մահացու ելքերին՝ Լիանա Թորոսյանն ասաց. «Մահացու դեպքերը արձանագրվում են այն անձանց շրջանում, որոնք ունեն ուղեկցող հիվանդություններ։ Այսինքն այս ամբողջը կարելի է նմանեցնել գրիպին, և բոլոր կանխարգելիչ միջոցները մասնավորապես օդակաթիլային փոխանցումով այս դեպքում կիրառելի են և նաև կենցաղ-կոնտակտի ճանապարհով վարակի փոխանցումը։ Այս պատճառով է, որ Առողջապահության նախարարությունը Չինաստանում գտնվող հայրենակիցներին անընդհատ կոչ է անում, որպեսզի հետևեն ձեռքերի հիգիենային, օգտագործեն լավ եփված սնունդ, շշալցված ջուր»,-հավելեց Լիանա Թորոսյանը։

Աղբյուր` Փաստինֆո