Փաստ ինֆո

Սերտ հաղորդակցության մեջ ենք գտնվում առողջապահության համաշխարհաին կազմակերպության հետ և իրավիճակի հետ կապված նոր տվյալներ ենք վերցնում։ Լրագրողների հետ հանդիպման ժամանակ այս մասին հայտարարեց Առողջապահության փոխնախարար Լենա Նանուշյանը։

Այս պահի դրությամբ ԱՀԿ-ի տրամադրած տվյալների համաձայն՝ 4537 հաստատված դեպք է 106 մահվան ելքով. «Միաժամանակ տեղեկատվություն ենք վերցնում նաև այլ աղբյուրներից։ Չինաստանի Ժողովրդական Հանրապետության առողջապահության հարցերով պետական հանձնաժողովի հաղորդագրության համաձայն՝ արձանագրվել է 5997 դեպք, 132-ը մահվան ելքով։ Ասեմ, որ դեպքերի մեծամասնությունը գրանցվել է Չինաստանում, սակայն արդեն իսկ գրանցվել են դեպքեր այլ երկրներում՝ Ֆրանսիայում, Գերմանիայում, ԱՄՆ-ում, Կորեայում, Ճապոնիայում, Թաիլանդում, Ավստրալիայում։ Հիմնական դեպքերը, որոնք Չինաստանից դուրս գրանցվել են կապված են այն ճամփորդների հետ, որոնք այդ երկրներ են ժամանել Ուհանից։ Հիմնական այս դեպքերը գրանցվել են Ուհան քաղաքում և Չինաստանի իշխանությունը շատ արագ հայտարարել է կարանտին Ուհան քաղաքում, ներկայումս նաև ընդլայնել է կարանտինը հարակից այլ քաղաքների վրա և դադարեցվել է տեղաշարժը» ,-նշեց Առողջապահության փոխնախարարը։

Վերջինս տեղեկացրեց, որ բոլոր շահագրգիռ գերատեսչությունների հետ կազմակերպվել են մի շարք քննարկումներ, որոնց արդյունքում ՍԱՏՄ-ի հետ որոշումէ կայացվել, որ հունվարի 26-ից կարգելվի Չինաստանից կենդանական ծագման մթերքների և ծովամթերքների մուտքը Հայաստան։ Լենա Նանուշյանի խոսքով ԱԳՆ-ի և Զբոսաշրջության կոմիտեի հետ համատեղ մշակվել է հուշաթերթ, որը տրամադրվում է տուրիստական գործակալություններին, որպեսզի տեղյակ լինեն և արդեն ժամանած խմբերում, եթե որոշակի սիմպտոմներ հայտնաբերվեն, տեղեկացնեն նախարարությանը։

Աղբյուր` Փաստինֆո