Փաստ ինֆո

«Սեքյուրիթի դրիմ» ընկերության տնօրեն Արթուր Պողոսյանին փաստաթղթեր կեղծելուն հանցակցության համար առաջադրված մեղադրանքը բողոքարկվել է ՀՀ գլխավոր դատախազ Արթուր Դավթյանին։ «Փաստինֆո»-ն այս մասին տեղեկացավ Արթուր Պողոսյանի փաստաբան Արշակ Կարապետյանից։

Վերջինս հայտնեց՝ բողոքարկել են նաև Արթուր Պողոսյանի նկատմամբ ընտրված խափանման միջոց ստորագրությունը։
«Քննիչն այսպես ասած իր դատավարական լիազորություններն ու լծակներն օգտագործում է՝ ակնհայտ քաղաքացիաիրավական վեճը ներքաշելով քրեաիրավական դաշտ, ինչը որակում եմ ապօրինի քրեական հետապնդում»,-նշեց Արշակ Կարապետյանը՝ ընդգծելով՝ որպես այդպիսին փաստեր և ապացույցներ գոյություն չունեն։

Հարցին՝ Արթուր Պողոսյանն ընդունում է իրեն առաջադրված մեղադրանքը, թե ոչ, փաստաբանը նկատեց՝ ինչ դիրքորոշում պետք է հայտնի մի անձ, ում զավեշտի հասնող մեղադրանք են ներկայացնում. «Զավեշտալի է, որովհետև վաղուց չէի տեսել նման մեղադրանք, որ այդ հարցի և քննարկման վերաբերյալ լինեն օրինական ուժի մեջ մտած դատական վճիռներ, բայց քննիչն այդ օրինական ուժի մեջ մտած վճիռներին բացարձակ հակառակ որոշում կայացնի, միևնույն ժամանակ դիտարկելով, որ դրանք իրենց մեջ պարունակում են քրեական ոլորտում կարգավորվող առարկաներ։ Արթուր Պողոսյանը, լինելով երկար տարիների իրավաբան, շատ լավ հասկանում է այդ մեղադրանքի չհիմնավորված, ապօրինի լինելը և բնականաբար չի էլ կարող նման մեղադրանքն ընդունել»,-հավելեց փաստաբանը։

Ավելի վաղ «Փաստինֆո»-ն հայտնել էր՝ փաստաթղթեր կեղծելուն հանցակցության համար մեղադրանք է առաջադրվել «Սեքյուրիթի դրիմ» ընկերության տնօրեն Արթուր Պողոսյանին։

ՔԿ հասարակայնության հետ կապերի բաժնի պետի պաշտոնակատար Նաիրա Հարությունյանը նշել էր՝ Արթուր Պողոսյանին մեղադրանք է առաջադրվել ՀՀ ՔՕ 38-325-րդ հոդվածի 1-ին մասով, իսկ որպես խափանման միջոց ընտրվել է ստորագրությունը երկրից չհեռանալու մասին։

Նշենք, որ «Սեքյուրիթի դրիմ» ընկերության նախկին աշխատակիցներ Միքայել Պողոսյանը և Սիրակ Գրիգորյանը հաղորդում էին ներկայացրել՝ իրենց աշխատանքի չներկայանալու վերաբերյալ կեղծ փաստաթուղթ կազմելու վերաբերյալ։

Հիշեցնենք, որ քրեական գործը հարուցվել է մի խումբ անձանց կողմից նախնական համաձայնությամբ փաստաթղթերի կեղծելու դեպքի առթիվ` ՀՀ ՔՕ 325-րդ հոդվածի 2-րդ մասով։ Քրեական գործի շրջանակներում որպես մեղադրյալ է ներգրավվել նաև «Սեքյուրիթի դրիմ» ընկերության Ճանապարհային երթևեկության խախտումների վարչության պետ Արսեն Ղազարյանին։ Հավելենք՝ մարտի 1-ին «Սեքյուրիթի դրիմ» ընկերության աշխատակիցները բողոքի ակցիա էին իրականացրել, որից օրեր անց` մարտի 5-ին, արգելափակվել էին աշխատակիցների էլեկտրոնային անցագրերը և վերջիններս աշխատակիցների խոսքով անհիմն հեռացվել են աշխատանքից։

Հեղինակ՝ Հասմիկ Կոշկարյան

Աղբյուր` Փաստինֆո