Փաստ ինֆո

Հեղափոխությունից հետո Արթուր Վանեցյանն եղել է ԱԱԾ ղեկավարը և նրա համար հասարակության համար հանրային ճանաչելի գործունեությունն սկսվել է հենց այդ պահին։ Այդ ճանաչելիության համար նա պարտական է հեղափոխությանը, մասնավորապես ՀՀ վարչապետին։ ԱԺ –ում տեղի ունեցած ճեպազրույցում ասաց ԱԺ «Իմ քայլը» խմբակցության պատգամավոր Հայկ Կոնջորյանը։

Ըստ նրա՝ դեռ պետք է հասկանալ Վանեցյանի կողմից հնչած հայտարարություններին վերաբերվել որպես ԱԱԾ նախկին պետի հայտարարություններ, թե՞ ենթադրյալ քաղաքական հայտ ներկայացնող Արթուր Վանեցյանի հայտարարություններ։

«Քաղաքական հայտարարությունները, որ անում է Վանեցյանը, կարծում եմ, մակերեսային են, քանի որ նա չունի որևէ քաղաքական կապիտալ, նրա՝ մեզ հայտնի, հանրային գործունեությունը բացառապես տեղավորվել է ԱԱԾ ղեկավարի շրջանակներում»,-ասաց Կոնջորյանը։

Նրա կարծիքով, Վանեցյանի հայտարարություններն իրականությունից կտրվածության դրսևորումներ ունեն և ավելի շատ համացանցում երևալու համար են։
«Իմ քայլը» խմբակցության ղեկավար Լիլիթ Մակունցն էլ ավելացրեց. «Կարծում եմ, որ այլևս չպետք է անդրադառնանք Արթուր Վանեցյանի հայտարարություններին, որովհետև նա հանրային կերպով հայտ չի ներկայացրել, և երբ ԱԱԾ նախկին տնօրենը կհայտարարի այն մասին, որ զբաղվում է քաղաքականությամբ, այդ ժամանակ հստակ կլինեն բոլոր դիրքավորումները և կհասկանանք Արթուր Վանեցյանին որպես ինչ ենք արձագանքում»։

Հեղինակ՝ Սոնա Գեւորգյան

Աղբյուր` Փաստինֆո