Փաստ ինֆո

Հունվարի 28-ին Միլան-Երևան չվերթի իրականացման ընթացքում առաջացած խնդիրները կապված են ոչ թե ուղևորների, այլ Ryanair ավիաընկերության գործելաոճի հետ։ Այս մասին ֆեյսբուքյան ուղիղ եթերի ժամանակ հայտարարեց Passenger.am հարթակի համահիմնադիր Գուրգեն Ղազարյանը, ով նույնպես եղել է այդ չվերթի ուղևոր, ում, բարեբախտաբար, հաջողվել է մուտք գործել օդանավ։

«Միլանի օդանավակայանում Check in իրականացնում էր ընդամենը մեկ պատուհան։ Դա անկազմակերպ վիճակ էր, որովհետև ֆիզիկապես հնարավոր չէ, որ մեկ պատուհանը կարողանա սպասարկել 100-ից ավել ուղևորի։ 80 րոպեում 100-ից ավել ուղևոր սպասարկելն անհնար է։ Ես հասցրեցի մուտք գործել օդանավ, որտեղ տեղեկացա, որ մոտ 4 տասնյակ ուղևոր չի կարողացել օդանավ մուտք գործել»,-ասաց Գուրգեն Ղազարյանը՝ հավելելով, որ ուղևորների զգալի մասն արդեն իսկ դիմել է Passenger.am-ին և լիազորել՝ զբաղվեն այդ գործով, բանակցություններ վարեն Ryanair-ի հետ, որպեսզի ուղևորները փոխհատուցվեն.

«Խնդիրը եղել է ոչ թե ուղևորների, այլ Ryanair-ի գործելաոճի մեջ, որն անկազմակերպ է եղել։ Մինչև վերջ պայքարելու ենք, որպեսզի բոլոր ուղևորները ստանան իրենց փոխհատուցումները»,-նշեց Գուրգեն Ղազարյանը՝ ևս մեկ անգամ ընդգծելով, որ խնդրի մեջ մեղավորը եղել է ավիաընկերությունը։

Գուրգեն Ղազարյանը նկատեց՝ այս խնդիրները պետք է ունենան ֆունդամենտալ լուծումներ։ Նրա խոսքով Երևան-Միլան չվերթի ժամանակ Զվարթնոց օդանավակայանում Check in կատարում էր 4 պատուհան, ամեն ինչ կազմակերպված էր, սակայն այստեղ էլ կային ուրիշ խնդիրներ. «Կային մարդիկ, որ ուղեբեռը գնել էին, բայց ծրագրով ցույց չէր տալիս։ Ասացին՝ խնդիրը նրանում է, որ Զվարթնոց օդանավակայանի ծրագիրը հին է։ Այլ չվերթների վերաբերյալ նույնպես ունենք նամակներ եղել են, ինչը նշանակում է՝ խնդիրներին պետք է համակարգային լուծումներ տրվեն»,-ասաց Գուրգեն Ղազարյանը։

Վերջինս հավելեց՝ Քաղավիացիայի կոմիտեին առաջարկում են ստեղծել ուսումնասիրող հանձնաժողով, որի ներկայացուցիչները ներկա կլինեն Check in-ի գործընթացին, կարձանագրեն ու կուսումնասիրեն նմանատիպ խնդիրները. «Պետք է ամեն ինչ անել, որպեսզի ուղևորը հասկանա՝ ինչպես է կատարվում այս գործընթացը։ Հակառակ պարագայում նմանատիպ խնդիրները մարդկանց մեջ կարող են վախ առաջացնել»,-հավելեց Գուրգեն Ղազարյանը։

Հիշեցնենք, որ երեկ՝ հունվարի 28-ին, Միլան-Երևան FR4456 չվերթի մի քանի տասնյակ ուղևորները մերժվել են ինքնաթիռ նստեցման/գրանցման հարցում։ Passanger.am-ը տեղեկացնում է, որ ըստ ԵՄ 261/2004 կարգավորման այս պարագայում ևս ավիաընկերությունը պարտավոր էր ուղևորներին տրամադրել այլընտրանքային թռիչք դեպի նախնական ամրագրված նշանակման կետ, հոգալ ուղևորների ըմպելիքն/սննդի (եթե հետաձգումը տևում է ավելի քան 2 ժամ) և կացության (եթե հետաձգումը տևում է ավելի քան 5 գիշերային ժամ) հարցերը։ Քիչ առաջ քաղավիացիայի կոմիտեն հայտարարեց, որ տեղյակ է առաջացած խնդրի մասին։ Նրանք խնդրի մասին տեղեկացրել են նաև Ryanair ավիաընկերության ղեկավարությանը։

Աղբյուր` Փաստինֆո