Փաստ ինֆո

Երեկ մեզ բերման ենթարկելու պրոցեսը մի մարդ նկարում էր ու դա չէր անում 02-ով ցույց տալու համար, այլ այդ նկարվածն ինչ-որ տեղ էր գնում։ Այս մասին այսօր ֆեյսբուքյան ուղիղ եթերում ասաց «Քաղաքացիական գիտակցություն» հկ-ի նախագահ Նարեկ Սամսոնյանը։

Նա նշեց, որ առավոտյան՝ Նարեկ Մալյանին բերման ենթարկելուց հետո, իրեն զանգել ու տեղեկացրել են, որ հաջորդն ինքն է. «Մենք մեր գրասենյակի տարածքում, բակերով մեկ միացրինք մեր 7-րդ վարչությունն ու գիտեինք, թե որտեղ են այդ օպերատիվ մեքենաները սպասում, որ ինձ գրասենյակից դուրս գալիս պառկեցնեն, նկարեն, տան Նիկոլն ու Աննան ուրախանան»։

Սամսոնյանը պատմեց, որ գրասենյակից դուրս է եկել այլ ճանապարհով ու գանցել 6-րդ վարչություն. «Այնտեղ ինձ վրա նշանակված մարդիկ կային, ովքեր իրար փոխարինելով ինձ հետևում էին, որ հանկարծ ինձ չվերցնեն, բայց ես տղաներին խնդրեցի, որ ինձ չպահեն, ոստիկանները բռնեն, որ ես շուտ պրծնեմ, ավելի լավ է բոլորով լինենք այնտեղ, որ հետո նորից չգային ընկերներս...»։

Խոսելով երեկ Ոստիկանության վարչության դիմաց հավաքված իր ընկերների մասին, ասաց, որ ձևավորվում է մեծ քաղաքական կոնսոլիդացիայի հնարավորություն, որը շատ կարևոր է ՀՀ ապագայի համար։

«ՀՀ ապագան երեկ ՀՀ Ոստիկանության համապատասխան վարչության դիմաց էր, ֆեյսբուքում էր, օնլայն նայում էր այն խուլիգանությունը, որը տեղի էր ունենում օրվա ողջ ընթացքում»,-ասաց Սամսոնյանը։

Նրա կարծիքով, Հայաստանում այսօր սողացող իշխանափոխության ուրվական կա, որը շնչում է Նիկոլ Փաշինյանի թիկունքին. «Վերջին օրերի ընթացքում Նիկոլ Փաշինյանի քաղաքական դեմքը փրկելու բոլոր փորձերն (face saving) ավարտվել են «ֆիասկոյով»։ Նիկոլ Փաշինյանն ամեն հաջորդ քայլում սխալվում է։ Այս մարդիկ ժնևում 2 օր բանակցելու են Արցախի հարցից, ունի Ամուլսարի խնդիր, ունի սպանդանոցների խնդիր, բալային համակարգ։ Այս տղան ճկռել է պրոբլեմների տակ, նա արդեն գնացող իշխանություն է, իսկ իշխանափոխության մեխանիկան իշխանության ջղաձգումների ֆոնի վրա, ստացել է կոնկրետ տեսք, որը ՀՀ քաղաքացին է»,-ասաց Սամսոնյանը։

Աղբյուր` Փաստինֆո